استانادا اسىرەسە جەتىگە تولماعان بالالار اراسىندا قىزىلشا اسقىنىپ تۇر-باسقارما

ماۋسىمدىق ۆيرۋستىق ينفەكتسيالار، ونىڭ ىشىندە قىزىلشانىڭ ورشۋىنە بايلانىستى № 3 كوپسالالى قالالىق بالالار اۋرۋحاناسىندا كەلۋشىلەر سانى ارتتى.

قابىلداۋ بولمەسىندە دارىگەر كومەگىن كۇتكەندەردەن ۇزىن- سونار كەزەك قالىپتاستى.

«ءيا، شىنىندا دا دارىگەردىڭ قابىلداۋىن كۇتۋ ۋاقىتى كەيدە 1,5-3 ساعاتتان اسادى. سەبەبى جەدەل جاردەم شاقىرعان پاتسيەنتتەر سانى 2,5 ەسەگە دەيىن ءوستى. بۇل ۆيرۋستىق ينفەكسيا - جرۆي، قىزىلشا، جەدەل ىشەك ينفەكسياسى جيىلىگىنىڭ ارتۋىنا بايلانىستى. وسىعان وراي جالپى قابىلداۋ بولمەسىندە 8 قابىلداۋ بەكەتى، ونىڭ ىشىندە قىزىلشا بويىنشا قابىلداۋ بولمەسىندە 2 بەكەت ۇيىمداستىرىلدى. تاۋەكەل توبىنداعى بالالارعا (Triage جۇيەسى بويىنشا قىزىل ءتۇس) كەزەكتەن تىس قىزمەت كورسەتىلەدى. سونداي- اق، ءاربىر ينفەكتسيالىق بولىمشەگە قوسىمشا ورتا مەديتسينالىق پەرسونالدىڭ تاعى ءبىر بەكەتى قويىلدى»، - دەپ ءتۇسىندىردى اۋرۋحانانىڭ باسپا ءسوز قىزمەتى.

دەنساۋلىق ساقتاۋ باسقارماسىنىڭ مالىمەتىنشە، قالادا قىزىلشا بويىنشا توسەك-ورىن جۇكتەمەسى -%42.

ەرەسەكتەر اراسىندا قىزىلشا جۇقتىرىپ، ستاتسيوناردا ەمدەلىپ جاتقان 63 ناۋقاس بار. ولاردىڭ جاعدايى - ورتاشا اۋىر.

«ەرەسەكتەر اراسىندا قىزىلشا جۇقتىرۋ قارقىنى تومەن ەكەنىن كورىپ وتىرمىز، ال اۋىر اسقىنۋعا نەگىزىنەن مەكتەپ جاسىنا دەيىنگى بالالار ۇشىراپ جاتىر. اۋرۋحانادا جاتقان 1 جاستان 7 جاسقا دەيىنگى بالالاردىڭ %70 قىزىلشامەن كەلگەن. بۇل - ۆاكتسينا الماعان بالالار، ال ەكپە العاندار اۋرۋدى امبۋلاتوريالىق دەڭگەيدە جەڭىل وتكەرەدى. ولاردىڭ دەنەسىندە مۇنداي جوعارى تەمپەراتۋرا مەن بورتپە بولمايدى. 3-5 كۇندە ساۋىعادى. ولاردى ۆاكتسينا قۇتقاردى»، - دەيدى قالالىق دەنساۋلىق ساقتاۋ باسقارماسى.

دارىگەرلەر قىزىلشانىڭ الدىن الۋ جانە قورعاۋ ۆاكسيناتسيا ارقىلى عانا مۇمكىن ەكەنىن كەزەكتى رەت ەسكە سالدى.

ايتا كەتەيىك، ەلوردادا قىزىلشاعا قارسى قوسىمشا جاپپاي يممۋنداۋ جالعاسىپ جاتىر.

بالالار ەكپەنى قالانىڭ بارلىق ەمحاناسىنان تەگىن الا الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى