استانا- تالدىقورعان باعىتىنداعى ۇشاق اۋا رايىنىڭ قولايسىزدىعىنا بايلانىستى ۇشپاي قالدى
تالدىقورعان. KAZINFORM - كەشە استانا - تالدىقورعان باعىتىنداعى ۇشاقتىڭ كەستەدەن كەشىگۋىنە بايلانىستى الەۋمەتتىك جەلىگە جولاۋشىلاردىڭ نارازىلىعى جاريالانعان ەدى. «جەتىسۋ» اۋەكومپانياسى جاۋاپ بەردى.
الەۋمەتتىك جەلىدە استانا اۋەجايىندا تالدىقورعانعا جەتە الماي تۇرعان جولاۋشىلاردىڭ نارازىلىعى جاريالاندى. جازبادا «Qazaq AIR» اۋەكومپانياسىنىڭ وكىلى تالدىقورعان قالالىق اۋەجايىنىڭ ۇشاقتى قابىلداۋعا دايىن ەمەس ەكەنىن ايتادى.
ال «جەتىسۋ» اۋەكومپانياسىنا جاۋاپتى باسشىلار ۇشاقتى قابىلداۋعا تولىق دايىن ەكەنىن، رەيستىڭ كەشىگۋ سەبەبىن اۋا رايىنىڭ قولايسىزدىعىنان دەپ ءتۇسىندىردى.
«ۇشاقتاردى مۇزدان تازارتۋعا ارنالعان سۇيىقتىقتىڭ جوق ەكەندىگى جانە ارنايى كولىكتەردىڭ جۇمىسقا جارامسىزدىعى تۋرالى الەۋمەتتىك جەلىدە جاريالانعان مالىمەتتىڭ شىندىققا جاناسپايدى. وزدەرىڭىز كورىپ تۇرعانداي، اۆتوتەحنيكا جۇمىسقا جارامدى، وتالىپ تۇر جانە مۇزدان تازارتۋعا ارنالعان سۇيىقتىقپەن قامتاماسىز ەتىلگەن. «استانا- تالدىقورعان» باعىتىنداعى ۇشاقتى قولايسىز اۋا-رايى مەن تاڭەرتەڭنەن بەرى جاۋىپ تۇرعان قاردان ۇشۋ جولاعىنىڭ كورىنبەۋىنە بايلانىستى «Qazaq Air» اۋەكومپانياسى اۋە رەيسىن توقتاتۋعا ءماجبۇر بولدى»، - دەدى «جەتىسۋ» اۋە كومپانياسى پرەزيدەنتىنىڭ مىندەتىن اتقارۋشى جايدارلى قۇدايبەرگەنوۆ.
ايتا كەتەيىك تالدىقورعان اۋەجايى اپتاسىن ءۇش كۇن: سارسەنبى، جۇما، جەكسەنبى كۇندەرى استانادان كەلەتىن ۇشاقتاردى قابىلدايدى.
