استانا مەن الماتى كوشەلەرىندە ەڭ ءجيى كەزدەسەتىن توپ-10 كولىك اتالدى
استانا. قازاقپارات - Sergek ITS ماماندارى قازاقستاننىڭ ەكى ءىرى قالاسى - استانا مەن الماتىداعى كولىك قوزعالىسىن سارالاپ، ەڭ ءجيى تىركەلگەن كولىك ماركالارى مەن مودەلدەرىن انىقتادى.
بىرنەشە ۋاقىت كەزەڭىندەگى دەرەكتەردى سالىستىرۋ ارقىلى ساراپشىلار جولداردا ءجيى كەزدەسەتىن كولىكتەردىڭ توپ-10 ءتىزىمىن جاسادى. بۇل ەسەپتە بەلگىلى ءبىر ماركاداعى كولىكتىڭ ناقتى جول ۋچاسكەسىنەن قانشا رەت وتكەندىگى ەسكەرىلدى. ايتا كەتۋ كەرەك، بۇل - بىرەگەي كولىكتەر سانى ەمەس، ءبىر كولىك بىرنەشە رەت ءوتۋى مۇمكىن.
استانا
زەرتتەۋ 2025-جىلدىڭ 12-20-قاڭتار ارالىعىندا تۇران داڭعىلىنىڭ ورتالىق ساياباق ماڭىنداعى بولىگى مەن تۇلپار كوپىرىنەن قورعالجىن تاس جولىنا تۇسەتىن تۇستا جۇرگىزىلدى.
وسى ۋاقىت ارالىعىندا ەلوردادا ەڭ ءجيى تىركەلگەن كولىك - Toyota Camry، شامامەن 71 مىڭ رەت وتكەن. ەكىنشى ورىندا Chevrolet Cobalt كولىگى 36,6 مىڭ رەت، ال ءۇشىنشى ورىندا - Hyundai Tucson (31,5 مىڭ). سونداي-اق تانىمال مودەلدەر قاتارىندا Hyundai Elantra (24,3 مىڭ)، Hyundai Accent (22,5 مىڭ)، Toyota Land Cruiser Prado (22 مىڭ) جانە قىتايلىق اۆتووندىرۋشىلەردىڭ كولىكتەرى (19 مىڭ) جيى كەزدەسكەن.
الماتى
زەرتتەۋ 2025-جىلدىڭ 17-اقپانىنان 7-ساۋىرىنە دەيىن ءال-فارابي داڭعىلىنىڭ شىعىس باعىتىندا - Esentai Mall ساۋدا ورتالىعىنىڭ قارسى بەتىندە جانە ودان شىعىسقا قاراي جۇرگىزىلدى.
الماتىدا دا كوش باسىندا - Toyota Camry (67,3 مىڭ رەت). ودان كەيىن Chevrolet Cobalt (63 مىڭ). ۇزدىك ۇشتىكتى Hyundai Tucson (38,1 مىڭ) تۇيىندەدى. ءتورتىنشى جانە بەسىنشى ورىنداردا Hyundai Elantra (30,8 مىڭ) مەن Hyundai Accent (شامامەن 29 مىڭ) تۇر. التىنشى ورىندا - Kia Rio (22 مىڭ رەت).
ايتا كەتەيىك، بۇل مالىمەتتەر Sergek ITS - ينتەللەكتۋالدى كولىك جۇيەسىنىڭ كومەگىمەن الىندى. جۇيە جول قوزعالىسىن باقىلاۋ، تالداۋ جانە بولجاۋ ارقىلى اقىلدى قالالار ءۇشىن ءتيىمدى شەشىمدەر ۇسىنادى.
بۇعان دەيىن الماتىدا «سەرگەكتىڭ» جاڭا قىزمەتى مىڭنان استام زاڭ بۇزۋشىلىقتى انىقتاعانىن جازدىق.
