استانا كوشەسىنە ماجار اقىنى شاندور پەتەفيدىڭ ەسىمى بەرىلەدى
ەلورداداعى جاڭا كوشەلەردىڭ بىرىنە بيىل تۋعانىنا 200 جىل تولاتىن ماجار اقىنى شاندور پەتەفيدىڭ اتى بەرىلەدى.
بۇل جايىندا مەملەكەت باسشىسى قاسىم-جومارت توقايەۆ ماجارستان پرەمەر-ءمينيسترى ۆيكتور وربانمەن اقورداداعى كەزدەسۋدەن كەيىنگى بىرلەسكەن مالىمدەمەسىندە ايتتى، دەپ حابارلايدى Kazinform اگەنتتىگى.
«ماجار ۇكىمەتىنىڭ قولداۋىمەن سوڭعى 10 جىلدا قازاقستان ستۋدەنتتەرىنە ءبىلىم گرانتتارى ءبولىنىپ كەلەدى. كوپ جاستارىمىز ماجارستاننىڭ جەتەكشى جوعارى وقۋ ورىندارىندا ءبىلىم الىپ ءجۇر. جاڭا عانا وسى باعدارلامانى جالعاستىرۋ جونىندەگى مەموراندۋمعا قول قويىلدى. بۇل قۇجات ءبىلىم سالاسىنداعى بايلانىستى ودان ءارى تەرەڭدەتۋگە جول اشادى. بيىل ماجار حالقىنىڭ ۇلى پەرزەنتى شاندور پەتەفيدىڭ تۋعانىنا 200 جىل تولدى. وسىعان وراي بۇگىن استانادا جاڭا كوشەگە اقىننىڭ ەسىمى بەرىلەدى. ءبىز كوپجاقتى ديپلوماتيانى ودان ءارى نىعايتۋعا ەرەكشە ءمان بەرەمىز»، - دەدى قاسىم-جومارت توقايەۆ.
بۇعان دەيىن اقوردادا ماجارستان پرەمەر-ءمينيسترىن قارسى الۋ سالتاناتى وتكەنىن جازعان ەدىك.
قاسىم-جومارت توقايەۆ ۆيكتور وربانمەن كەزدەسۋ كەزىندە ەكى ەلدىڭ باۋىرلاستىق بايلانىسى تۋرالى ايتتى.
ەسكە سالساق، كەشە كەشكە ۆيكتور ورباندى استانا اۋەجايىندا ۆيتسە-پرەمەر سەرىك جۇمانعارين كۇتىپ العان بولاتىن.
قازاقستان باسشىلىعىمەن كەلىسسوز بارىسىندا قازاقستان مەن ماجارستان اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى تەرەڭدەتۋ ماسەلەلەرى تالقىلانادى دەپ جوسپارلانىپ وتىر.
