اسكەري وقۋ ورىندارىنا قۇجات قابىلداۋ مەرزىمى جاريالاندى
استانا. KAZINFORM – ق ر قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى جۇمابەك احمەتوۆ ەلىمىزدەگى اسكەري جوعارى وقۋ ورىندارىنا ءتۇسۋ ءتارتىبىن ءتۇسىندىردى. بۇل رەتتە مەرزىمدى اسكەري قىزمەتتەگى ازاماتتار اسكەري ينستيتۋتتارعا ۇ ب ت تاپسىرماي-اق تۇسە الادى.
ق ر قورعانىس مينيسترلىگىنىڭ اسكەري ءبىلىم بەرۋ جۇيەسىنە 9 اسكەري وقۋ ورنى كىرەدى. ورتا ءبىلىم بويىنشا 3 رەسپۋبليكالىق «جاس ۇلان» مەكتەبى، استانا مەن شۋچە قالالارىندا 2 تەحنيكالىق جانە كاسىپتىك اسكەري كوللەدج بار.
جوعارى بىلىمدە - قۇرلىق اسكەرلەرىنىڭ اسكەري ينستيتۋتى، اۋە قورعانىس كۇشتەرى اسكەري ينستيتۋتى جانە راديوەلەكترونيكا جانە بايلانىس اسكەري-ينجەنەرلىك ينستيتۋتى مامانداردى دايارلايدى. ال جوعارى وقۋ ورنىنان كەيىنگى (ماگيستراتۋرا جانە دوكتورانتۋرا) بىلىمدە - ۇلتتىق قورعانىس ۋنيۆەرسيتەتى بار.
«2024-جىلى اسكەري ينستيتۋتتارعا ءتۇسۋ ءۇشىن ۇ ب ت ناتيجەلەرىنىڭ تالاپتارىنا ءتيىستى وزگەرىستەر ەنگىزىلدى: ەڭ تومەنگى ءوتۋ بالى – 50، بەيىندى پاندەر بويىنشا دا وزگەرىس جوق - 7 بال، ق ر عىلىم جانە جوعارى ءبىلىم مينيسترلىگى بيىل ماتەماتيكالىق ساۋاتتىلىق پەن وقۋ ساۋاتتىلىعى بويىنشا سۇراقتار سانىن 20 دان 10 بالعا دەيىن تومەندەتكەندىكتەن، وقۋ مەن جازۋ ساۋاتتىلىعى 5 تەن 3 بالعا دەيىن تۇسىردىك»، - دەدى ج. احمەتوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سپيكەر مەرزىمدى اسكەري قىزمەتتەگى ازاماتتارعا اسكەري ينستيتۋتتارعا ءتۇسۋ ەمتيحاندارىنسىز جانە ۇ ب ت تاپسىرماي ءتۇسۋ مۇمكىندىگى قاراستىرىلعانىن اتاپ ءوتتى. وقۋعا ءتۇسۋ كۆوتاسى جالپى قابىلداۋ جوسپارىنىڭ %25 قۇرايدى.
جەرگىلىكتى اسكەري باسقارۋ ورگاندارىنىڭ قۇجات قابىلداۋ مەرزىمى 10- ماۋسىمعا دەيىن ۇزارتىلدى، قۇجاتتاردى اسكەري ينستيتۋتقا تاپسىرۋ مەرزىمى - وقۋعا تۇسكەن جىلدىڭ 15-31- شىلدە ارالىعىندا بولماق.
ازاماتتار مەن اسكەري قىزمەتشىلەردى اسكەري ينستيتۋتتارعا قابىلداۋ 1-20- تامىز ارالىعىندا بىرنەشە كەزەڭمەن جۇرگىزىلەدى: I كەزەڭ - كاسىبي-پسيحولوگيالىق ىرىكتەۋ؛ II كەزەڭ - اسكەري-دارىگەرلىك ساراپتامانى جۇرگىزۋ ەرەجەلەرىنە سايكەس قورىتىندى مەديتسينالىق تەكسەرۋ؛ III كەزەڭ - دەنە دايىندىعىن تەكسەرۋ؛ IV كەزەڭ - كونكۋرستىق ىرىكتەۋ جانە تىركەۋ.
قابىلداۋ كوميسسياسىنىڭ شەشىمى 21- تامىزدا ساعات 10:00 گە دەيىن جاريالانادى جانە اسكەري ينستيتۋتتىڭ ينتەرنەت-رەسۋرسىندا ورنالاستىرىلادى. اپەللياتسيالىق شاعىمدار 22- تامىز ساعات 10:00 گە دەيىن قابىلدانادى.
قابىلداۋ كوميسسياسىنىڭ قابىلداۋ تۋرالى شەشىمى اسكەري ينستيتۋت باستىعىنىڭ بۇيرىعىمەن قابىلدانعان جىلدىڭ 23- تامىزىندا بەكىتىلەدى.
