اسكەري تەڭىزشىلەر كاسپيدەن كەلەتىن قاتەرگە قالقان بولىپ وتىر ما
ەل ەگەمەندىك العالى جاۋىنگەرلىك تەڭىز فلوتى وتاندىق ۇلگىدەگى جاڭا كەمەلەرمەن تولىعىپ، سۋداعى اسكەر قاتارىندا جاڭا كۇشتىك قۇرىلىمدار پايدا بولدى. سونىڭ ءبىرى - اقتاۋداعى اسكەري تەڭىز بازاسىنداعى سۇڭگۋىرلەر روتاسى، دەپ حابارلايدى قازاقپارات ءتىلشىسى.
سۋ استىندا ارەكەت ەتەتىن ارنايى جاساق دەسانتتى- شابۋىلداۋ اسكەرلەرىمەن بىرلەسە قيمىلدايدى. ولار سوڭعى ۇلگىدەگى قارۋ- جاراقپەن جابدىقتالعان، سۋدا اۋا كوپىرشىگىن شىعارمايتىن وتتەگى باللونىمەن تىنىستايدى.
دەسانتتى- شابۋىلداۋشى اسكەرلەر قاتارى 6 اي سايىن جاس ساربازدارمەن تولىعىپ تۇرادى.
«كەز كەلگەن اسكەرلەردەن ءبىرىنشى بولىپ، بۇرىن كەلۋ - ەڭ باستى ماقساتىمىز. وسى سالا قاتەرگە تولى، ول راس. كۇن دەمەي، ءتۇن دەمەي كوماندا بەرىلگەن بويدا - قاشان دا دايىنبىز.
سۋ استىندا ارەكەت ەتەتىن جاساق قازاقستاندىق زاۋىتتا جاسالعان وقۋ- جاتتىعۋ كەشەنىندە قىسى- جازى بىلىكتىلىگىن شىڭدايدى. جاعالاۋدا تۇرعان نىساننىڭ بيىكتىگى 14 مەترگە جۋىقتايدى. سونىڭ 6 مەتر بولىگىنە تەڭىز سۋى تولتىرىلعان. سۇڭگۋىرلەر توبى سۋ استىندا جاسايتىن ءىس- ارەكەتىن وسىندا قايتالايدى. كەشەننىڭ كەمە پالۋباسىنا ۇقساس بولمەسىنە ارقانمەن ورمەلەپ شىعۋ، كايۋتا ىشىنە بەكىنگەن قارسىلاستىڭ كوزىن جويۋ ءۇنسىز، ءارى مەيلىنشە جەدەل اتقارىلادى» ، - دەيدى سۇڭگۋىرلەر روتاسىنىڭ اعا ماتروسى زامانبەك باقتىگەرەيەۆ.
ارنايى جاساق لاڭكەستەر باسىپ العان كەمە نەمەسە تەڭىز ينفراقۇرىلىمىنا دىبىس شىعارماي جاقىنداپ، جاۋدىڭ كوزىن جويۋعا ماشىقتانعان.
«سۋ استىنان كەلەمىز. ءبىزدىڭ كەلگەنىمىزدى ەشكىم بايقاماۋ كەرەك. گيدروكوستيۋمدەر قارا ءتۇستى بولعاندىقتان تۇندە ءبىزدى ەشكىم كورمەيدى. سۋ استىندا اتاتىن ارنايى پيستولەتتەر بار. س پ پ-1 دەپ اتالادى. دەسانتتى- شابۋىلداۋشى اسكەرلەر جاعالاۋدا جۇگىرەدى»، - دەدى سۇڭگۋىرلەر روتاسىنىڭ كومانديرى جانىبەك ساليكبايەۆ.
سۇڭگۋىرلەر دەسانتتى- شابۋىلداۋشى توپقا جول اشىپ بەرەدى. ودان ءارى كۇشتىك قۇرىلىم پلاتسدارمعا بەكىنىپ، جاۋدى تالقاندايدى. تەڭىز دەسانتشىلارىنىڭ جاتتىعۋى كۇردەلى. الا جولاق جەيدەلى ساربازدار كۇندە جاعالاۋ جيەگىمەن بىرنەشە شاقىرىم جۇگىرەدى. قارۋمەن جانە اتىس قۇرالىنسىز جەكپە- جەك ۇرىس تاسىلدەرىنە ۇيرەنەدى.
«بۇرىن كاسپي تەڭىزىن تەك قانا تەلەديداردان كورەتىن ەدىم. قازىر دەسانتتى- شابۋىلداۋ باتالونىندا قىزمەت ەتىپ جاتىرمىن. تەڭىزدىڭ جاعاسىندا جاتتىعۋلار كۇندەلىكتى وتەدى جانە بۇل الداعى ۋاقىتتا بىزگە ءوز پايداسىن تيگىزەدى دەگەن ويدامىن»، - ماتروس نازار نازار ۇلى.
ايتا كەتەيىك، تاياۋدا اقتاۋ تەڭىز پورتىنداعى تاكتيكالىق وقۋ- جاتتىعۋدا جاۋىنگەرلەر كاسىبي شەبەرلىگىن بايقاتتى.
