اسكەري كوميتەت كۇشتەپ اسكەرگە الىپ كەتۋگە قۇقىلى ما؟

ق ر «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭنىڭ 31-بابىنا سايكەس اسكەرگە شاقىرۋدى كەيىنگە قالدىرۋعا نەمەسە ودان بوساتىلۋعا قۇقىعى جوق 18 جاستان 27 جاسقا دەيىنگى ازاماتتار مەرزىمدى اسكەري قىزمەتكە شاقىرىلادى.

اسكەري كوميسسارياتقا شاقىرۋ قاعازى سىزگە جەكە تاپسىرىلۋى كەرەك. ەگەر شاقىرۋ اتا-انا، دوستار، كورشى ارقىلى بەرىلسە نەمەسە پوشتا جاشىگىنە تاستالسا، ونىڭ زاڭدى كۇشى بولمايدى. اسكەري كوميسسارياتتان قوڭىراۋ شالسا دا، ول زاڭدى ەمەس.

ءسىز اۋىر اۋرۋ، ءولىم نەمەسە جاقىن تۋىسىڭىزدىڭ اۋۋىر اۋرۋعا شالدىعۋى، تابيعي اپاتقا بايلانىستى اسكەري كوميتەتكە بارماۋىڭىزعا بولادى. ءبىراق ول قۇجاتتارمەن راستالۋى كەرەك.

ال ەگەر ەشقانداي سەبەپسىز بارماعان بولساڭىز، اكىمشىلىك قۇقىقبۇزۋشىلىق تۋرالى كودەكستىڭ 647-بابى بويىنشا 5 ا ە ك مولشەرىندە ايىپپۇل تاعايىندالۋى مۇمكىن.

ەگەر سىزگە اسكەرگە شاقىرۋ قاعازى بەرىلىپ، بىردەن پوليتسيا قىزمەتكەرلەرىنىڭ سۇيەمەلدەۋىمەن اسكەري كوميتەتكە الىپ كەتسە، بۇل زاڭعا قايشى. ويتكەنى، شاقىرۋ قاعاز اسكەري كوميتەتكە كەلۋى ءۇشىن بەلگىلەنگەن مەرزىمنەن 2 جۇمىس كۇن بۇرىن تاپسىرىلۋى ءتيىس. بۇل اسكەري مىندەتتىلەر مەن اسكەرگە شاقىرىلۋشىلاردى اسكەري ەسەپكە الۋ ەرەجەلەرىندە كورسەتىلگەن.

شاقىرۋ قاعازى سىزگە ءبىرىنشى رەت بەرىلىپ تۇرسا، اسكەري كوميتەتكە ەشكىم ماجبۇرلەپ اپارا المايدى. ءسىزدى زاڭسىز كۇشتەپ الىپ كەتكەندەر قىلمىستىق كودەكستىڭ 414-بابىنا سايكەس سوتتالۋى مۇمكىن.

سونىمەن قاتار، ءسىزدى كوشەدە كەتىپ بارا جاتقان كەزىڭىزدە ۇستاپ، اسكەري كوميتەتكە الىپ كەتسە بۇل زاڭسىز، ۇرلاۋ جانە بيلىكتى اسىرا پايدالانۋ بولىپ سانالادى. سوندىقتان ءسىز پوليتسياعا ۇيالى تەلەفوننان 112، قالالىق تەلەفوننان 102 ءنومىرىن تەرۋ ارقىلى قوڭىراۋ شالا الاسىز.

ايتا كەتەيىك، اسكەردەن سالماقتى سەبەپسىز قاشقان بولساڭىز، ۇستىڭىزدەن مەملەكەتتىك بورىشتان جالتارعانىڭىز ءۇشىن قىلمىستىق ءىس قوزعالۋى مۇمكىن. ءىستى سوتقا جەتكىزەي، اسكەري كوميتەتكە ءوز ەركىڭىزبەن بارۋعا تىرىسىڭىز. ايتپەسە، قىلمىستىق كودەكستىڭ 387-بابى بويىنشا اسكەري قىزمەتتەن جالتارعانى ءۇشىن 1000 ا ە ك (3450000 تەڭگە) مولشەرىندە ايىپپۇل نەمەسە سول مولشەردە تۇزەۋ جۇمىستارى نە ءبىر جىلعا دەيىن شەكتەۋ نەمەسە باس بوستاندىعىنان ايىرۋ تاعايىندالۋى مۇمكىن.

وعان قوسا، اسكەري قىزمەتتەن جالتارۋ ءۇشىن ءوز دەنساۋلىعىڭىزعا قاساقانا زيان كەلتىرسەڭىز، قۇجاتتى قولدان جاساساڭىز قىلمىستىق جاۋاپكەرشىلىك كۇشەيتىلەدى. ياعني، 3000 ا ە ك

(10350000 تەڭگە) دەيىن ايىپپۇل، سول مولشەردە تۇزەۋ جۇمىستارى، 800 ساعاتقا دەيىن قوعامدىق جۇمىستار، 3 جىلعا دەيىن شەكتەۋ نەمەسە باس بوستاندىعىنان ايىرۋ تاعايىندالادى.

ەسكە سالايىق، بۇعان دەيىن اسكەري قىزمەتىن وتەگەندەر گرانتقا ۇ ب ت-سىز تۇسە الاتىنى تۋرالى حابارلانعان ەدى.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى