اسكەري كوللەدجدى ۇزدىك اياقتاعاندار جوعارى اسكەري وقۋ ورىندارىنا بىردەن ەكىنشى كۋرسقا قابىلدانادى

«استانا قالاسىنداعى اسكەري كوللەدجگە وقۋعا 15 جاسقا تولعان، ءبىراق 17 جاستان اسپاعان، 9-سىنىپتى اياقتاعان جاس وسپىرىمدەر قابىلدانادى. وقۋ مەرزىمى 2 جىل 10 ايدى قۇرايدى. كاسىپقوي سەرجانتتاردى دايارلاۋ ق ر قارۋلى كۇشتەرى ءۇشىن تالاپ ەتىلەتىن ءۇش ماماندىق، ءتورت بىلىكتىلىك بويىنشا جۇزەگە اسىرىلادى. اتاپ ايتقاندا، بايلانىس، راديوەلەكترونيكا جانە كوممۋنيكاتسيا قۇرالدارىنىڭ تەحنيگى، قارۋ-جاراق پەن اسكەري تەحنيكانى پايدالانۋ جانە جوندەۋ جونىندەگى تەحنيگى، ينجەنەرلىك-ساپەرلىك بولىمشەلەردى باسقارۋ، رادياتسيالىق، حيميالىق جانە بيولوگيالىق قورعانىس اسكەرلەرىنىڭ بولىمشەلەرىن باسقارۋ ماماندىقتارى بويىنشا»، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

وقۋدى بىتىرگەن ازاماتتار «كىشى سەرجانت» اسكەري اتاعىن، سونىمەن بىرگە «ۆ» جانە «س1» ساناتىنداعى جۇرگىزۋشىلەردى دايارلاۋ كۋرستارىن اياقتاعانى تۋرالى كۋالىك الادى جانە اسكەري بولىمدەرگە %100 جۇمىسقا ورنالاسادى.

«اسكەري كوللەدجدە وقۋدى ۇزدىك اياقتاعان ازاماتتار جوعارى اسكەري وقۋ ورىندارىنا بىردەن ەكىنشى كۋرسقا تۇسۋگە قۇقىلى جانە قىسقارتىلعان وقۋ باعدارلاماسى بويىنشا وقۋىن جالعاستىرادى. كوللەدجدەن كەيىن اسكەري ينستيتۋتتارعا تۇسەتىن ازاماتتار كوللەدجدە وتكىزىلەتىن رەيتينگتىك ىرىكتەۋ ناتيجەلەرى بويىنشا ۇ ب ت تاپسىرماي قابىلدانادى»، - دەپ ءتۇسىندىردى كوللەدج باستىعى.

سونداي-اق، بيىل شۋچينسك قالاسىنداعى اسكەري كوللەدجگە 9 جانە 11- سىنىپتاردى بىتىرگەندەردى قابىلداۋ جۇرگىزىلەدى. بۇرىن قابىلداۋ تەك 11- سىنىپتان كەيىن جۇرگىزىلگەن. وعان 280 ادامدى وقۋعا قابىلداۋ جوسپارلانىپ وتىر.

بۇعان دەيىن سپيكەر قازاقستانداعى اسكەري وقۋ ورىندارىنا قۇجات قابىلداۋ مەرزىمى ۇزارتىلعانى حابارلانعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى