اسكەردەن جالتارعاندار 1 جىلعا سوتتالۋى مۇمكىن
استانا. KAZINFORM - قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىسى دەپارتامەنتى باستىعىنىڭ ورىنباسارى فارحات ايداربايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا اسكەردەن جالتارعاندارعا قىلمىستىق كودەكستە قانداي جازا قاراستىرىلعانىن ەسكە سالدى.
ايتۋىنشا، مەرزىمدى اسكەري قىزمەتكە شاقىرتۋدان باس تارتقانى ءۇشىن زاڭنامادا قىلمىستىق جانە اكىمشىلىك جاۋاپتىلىق كوزدەلگەن.
- اكىمشىلىك قۇقىق بۇزۋشىلىق تۋرالى كودەكستىڭ 647-بابىندا اسكەري ەسەپتە تۇرعان نەمەسە تۇرۋعا مىندەتتى ازاماتتىڭ جەرگىلىكتى اسكەري باسقارۋ ورگانىنىڭ شاقىرۋى بويىنشا كورسەتىلگەن مەرزىمدە دالەلدى سەبەپسىز كەلمەۋى 5 ايلىق ەسەپتىك كورسەتكىش (19660 تەڭگە) مولشەرىندە ايىپپۇل سالۋعا اكەپ سوعادى.
وسى كودەكستىڭ 648-بابىندا اسكەرگە شاقىرۋ كوميسسياسىنىڭ جولداماسى بويىنشا مەديتسينالىق كۋالاندىرۋدان نە تەكسەرىلۋدەن جالتارعانى ءۇشىن اسكەرگە شاقىرىلۋشىلارعا ەسكەرتۋ جاساۋعا نە 3 ا ە ك (11796 تەڭگە) مولشەرىندە ايىپپۇل سالۋعا اكەپ سوعادى.
قىلمىستىق كودەكستىڭ 387-بابىنا سايكەس اسكەري قىزمەتتەن بوساتۋعا زاڭدى نەگىزدەر بولماعان كەزدە جالتارۋ ءبىر 1000 ا ە ك- كە دەيىنگى (3 ميلليون 932 مىڭ تەڭگە) مولشەردە ايىپپۇل سالۋعا نە سول مولشەردە تۇزەۋ جۇمىستارىنا، نە 400 ساعاتقا دەيىنگى مەرزىمگە قوعامدىق جۇمىستارعا تارتۋعا، نە بىر جىلعا دەيىنگى مەرزىمگە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋعا جازالانادى، - دەدى فارحات ايداربايەۆ.
سونداي-اق، ول اسكەرگە بارماۋ ءۇشىن ءوز دەنساۋلىعىنا قاساقانا زيان كەلتىرۋ، «اۋرۋمىن» دەپ جالعان قۇجات جاساۋ سياقتى ارەكەتتەر قاتاڭ جازالاناتىنىن ەسكەرتتى.
بۇعان دەيىن 28 -تامىزدا قازاقستاندا رەسمي تۇردە كۇزگى اسكەرگە شاقىرۋ ناۋقانى باستالعانىن جازعان ەدىك.
اۆتور
ەسىمجان ناقتىباي
