اسكەردە ءجۇرىپ كوماعا تۇسكەن سارباز ءىسى: قورعانىس مينيسترلىگى مالىمدەمە جاسادى

«مەرزىمدى قىزمەتتىڭ اسكەري قىزمەتشىسى ەربايان مۇحتاردىڭ جاراقات العانى تۋرالى ب ا ق پەن الەۋمەتتىك جەلىلەردە تاراتىلعان اقپاراتقا قاتىستى مىنانى تۇسىندىرەمىز. قاتارداعى جاۋىنگەر ەربايان مۇحتار ق ر ىشكى ىستەر مينيسترلىگىنىڭ ۇلتتىق ۇلان بولىمشەسىندە مەرزىمدى اسكەري قىزمەت اتقاردى. مەرزىمدى قىزمەتتىڭ ساربازدارى ۇلتتىق قاۋىپسىزدىك كوميتەتىنىڭ شەكارا قىزمەتىندە، ىشكى ىستەر مينيسترلىگىنىڭ ۇلتتىق ۇلانىندا، مەملەكەتتىك كۇزەت قىزمەتىندە جانە توتەنشە جاعدايلار مينيسترلىگىندە قىزمەت وتكەرەتىنىن حابارلايمىز. قورعانىس مينيسترلىگى اتالعان كۇشتىك قۇرىلىمدارداعى اسكەري قىزمەتتىڭ قاۋىپسىزدىگىن باقىلاۋدى جۇزەگە اسىرمايدى» دەلىنگەن حابارلامادا.

سونداي-اق، وتان الدىنداعى بورىشىن وتەي ءجۇرىپ، دەنساۋلىعىنا نۇقسان كەلگەن ەربايان مۇحتارعا قورعانىس مينيسترلىگى ۆەدومتسۆونىڭ ەمدەۋ مەكەمەلەرىندە مەديتسينالىق كومەك كورسەتۋگە دايىن ەكەنىن مالىمدەگەن.

«اسكەري قىزمەتشىلەردىڭ ءومىرى مەن دەنساۋلىعىن ساقتاۋ كومانديرلەر ءۇشىن باستى مىندەت بولىپ تابىلادى. ءبىز دە ەربايان مۇحتاردىڭ تۋىستارى مەن جاقىندارىمەن بىرگە ونىڭ دەنساۋلىعىنا الاڭدايمىز جانە ق ر قورعانىس مينيسترلىگىنىڭ ەمدەۋ مەكەمەلەرىندە مەديتسينالىق كومەك كورسەتۋگە دايىنبىز» دەپ جازعان ق ر ق م باسپا ءسوز قىزمەتى.

ايتا كەتەيىك، بۇعان دەيىن اسكەردە ءجۇرىپ، باس جاراقاتىن العان قاتارداعى جاۋىنگەر ەربايان مۇحتار 6 ايدان بەرى كومادا جاتقانى تۋرالى جازعان ەدىك.

ۇلتتىق ۇلاننىڭ حابارلاۋىنشا، قاتارداعى ەربايان مۇحتاردىڭ باس جاراقاتىن الۋ فاكتىسى بويىنشا ق ر ق ك 440-بابى 4-تارماعىنىڭ 3-بولىگىنە ساي قىلمىستىق ءىس قوزعالعان. بۇل جەردە اسكەري قىزمەتشىلەر اراسىنداعى ءوزارا قارىم-قاتىناستاردىڭ جارعىلىق ەرەجەلەرى بۇزىلعان.

اۆتور
ەربول جانات

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى