پرەزيدەنت «Ashyq» جۇيەسىندەگى كارانتين بۇزۋشىلارعا تالاپتاردى كۇشەيتۋدى تاپسىردى

«بۇعان دەيىن ايتقانىمداي، ءبىز پاندەميا جاعدايىندا ءومىر ءسۇرىپ، جۇمىس ىستەۋدى ۇيرەنۋىمىز كەرەك. بيزنەس پەن تۇتىنۋشىلار ءۇشىن بۇل «Ashyq» سيفرلىق شەشىمىنىڭ ارقاسىندا عانا مۇمكىن. باعدارلاما ءوز ماقساتىن اقتاپ كەلەدى. وعان قوسا، سوڭعى ۋاقىتتا ۆيرۋس جۇقتىرعاندار مەن بايلانىستا بولعاندار، ياعني قوعامدىق ورىندارعا باراتىن «قىزىل» جانە «سارى» مارتەبەسى بار ادامدار سانى ارتىپ كەلەدى»، - دەدى قاسىم-جومارت توقايەۆ ەلىمىزدەگى ەپيدەميولوگيالىق احۋال جونىندە كەڭەستە.

ونىڭ ايتۋىنشا، باعدارلاما «قىزىل» جانە «سارى» مارتەبەلەردى تىركەگەننەن كەيىن كەي ازاماتتار باسقا دەمالىس ورنىن ىزدەپ كەتەدى.

«شاماسى، مۇنداي جاۋاپسىز ادامدار ايىپپۇلدان قورىقپايدى، ويتكەنى ەشكىم ايىپپۇل سالىپ وتىرعان جوق. ال ج س ن مەن يممۋندىق مارتەبە جۇيەدە تىركەلىپ جاتىر عوي. مۇنداي جاۋاپسىزدىق جازالانۋى كەرەك. كارانتيندىك شەكتەۋلەردى ساقتاماعانى ءۇشىن تالاپتاردى قاتاڭداتۋدى تاپسىرامىن»، - دەدى ق. توقايەۆ.

ايتا كەتەيىك، پرەزيدەنتتىڭ قاتىسۋىمەن ەلىمىزدەگى كوروناۆيرۋس ىندەتىنە بايلانىستى ەپيدەميولوگيالىق احۋال جونىندە كەڭەس ءوتىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى