اسحات شاحاروۆ اقتوبەدەگى قىلمىستىق وقيعا تۋرالى پىكىر ءبىلدىردى
اقتوبە. KAZINFORM - اقتوبە وبلىسىنىڭ اكىمى اسحات شاحاروۆ كەپىلدە بولىپ، كوز جۇمعان ادامداردى جەرلەۋ راسىمىنە كومەك بەرىلەتىنىن الەۋمەتتىك جەلى ارقىلى حابارلادى.
اقتوبەدەگى قىلمىستىق وقيعادان سوڭ اسحات شاحاروۆ Facebook الەۋمەتتىك جەلىسىندە جازبا قالدىردى.
- قۇرمەتتى جەرلەستەر! وبلىس ورتالىعىنداعى قىلمىسكەردىڭ تۇندەگى ارەكەتى قوعامدا جان- جاقتى تالقىلانۋدا. بۇل جاعدايعا قاتىستى قىلمىستىق ءىس قوزعالىپ، تەرگەۋ امالدارى جۇرگىزىلىپ جاتقانىن ايتقىم كەلەدى. قۇقىقتىق باعاسىن قۇزىرلى ورگاندار بەرەتىن بولادى.
قازىرگى ۋاقىتتا زارداپ شەككەن جابىرلەنۋشىگە جان-جاقتى مەديتسينالىق جانە پسيحولوگيالىق قولداۋ كورسەتىلۋدە.
ال مارقۇم بولعان ازاماتتاردىڭ جەرلەۋ راسىمىنە قاجەتتى كومەكتەر ۇيىمداستىرىلادى. وسى رەتتە كۇدىكتىنى ۇستاۋدا كىرپىك ىلمەي، كاسىبيلىك تانىتقان پوليتسيا قىزمەتكەرلەرىنە العىسىمدى بىلدىرەمىن.
قاۋىپسىزدىك شارالارى - باقىلاۋىمدا، - دەپ جازعان اقتوبە وبلىسىنىڭ اكىمى.
ەسكە سالساق، اقتوبەدە تۇندە كەپىلدە بولىپ، بوساتىلعان 40 جاستاعى ايەلدىڭ جاعدايى ورتاشا اۋىر. دارىگەرلەر پىشاق جاراقاتى بولماعانىن حابارلادى.
