اسان اسىلحان: 15 جاسىمدا وسىنداي جەتىستىككە جەتكەنىمە قۋانىشتىمىن
استانا. KAZINFORM - فريستايل-اكروباتيكادان قازاقستان قۇراماسىنىڭ سپورتشىسى اسان اسىلحان حاربيندە (قىتاي) ءوتىپ جاتقان 2025 -جىلعى ازيا ويىندارىندا كۇمىس مەدال جەڭىپ الدى.
ق ر ۇ و ك مالىمەتىنشە، بۇل ناتيجەگە سپورتشى 15 جاسىندا قول جەتكىزدى. ونىڭ ايتۋىنشا، ەندى ونىڭ جوسپارى - وليمپيادا ويىندارىنىڭ ىرىكتەۋ كەزەڭىنەن ءوتۋ.
- وتە باقىتتىمىن. بۇل مەنىڭ حالىقارالىق دەڭگەيدەگى العاشقى مەدالىم. 15 جاسىمدا وسىنداي جەتىستىككە جەتكەنىمە قۋانىشتىمىن. باپكەرلەرىمە العىسىمدى بىلدىرگىم كەلەدى. بۇل سپورتقا مەن 5 جاسىمدا كەلدىم. ايتا كەتەرلىك جايت، فريستايل-اكروباتيكامەن مەنىڭ ۇلكەن اپكەم دە اينالىسقان. وكىنىشكە قاراي، قازىر ول مانسابىن اياقتادى. بالالىق شاعىمدا ءاردايىم اپكەممەن بىرگە سپورت زالعا باراتىنمىن. كىشكەنتاي كەزىمنەن باتۋتقا قىزىعاتىنمىن. ءبىراز ۋاقىت وتكەننەن كەيىن سەكسياعا جازىلۋدى شەشتىم. مەنىڭ العاشقى باپكەرىم ەلميرا سابيروۆنا بولدى. قىزىق، مەن باستاپقىدا باسقا باپكەرگە جازىلۋدى ويلاعان ەدىم، ءبىراق ەلميرا سابيروۆنا مەنى ءوز توبىنا شاقىردى. ازيا ويىندارىندا ءبىز باپكەرىمىز قويعان تاپسىرمالاردى ورىنداپ، جەتىستىككە جەتتىك. الداعى ۋاقىتتا FIS رەيتينگىندە ۇپاي جيناپ، وليمپيادا ويىندارىنا قاتىسۋعا ليتسەنزيا الامىز. ەڭ باستى ارمانىم - وليمپيادا ويىندارىندا جۇلدەگە قول جەتكىزۋ. الدا كوپ جۇمىس تۇر، ءبىراق باپكەرىمىزدىڭ باسشىلىعىمەن ءبىز ودان ءارى دامىپ، ناتيجەلەرىمىزدى جاقسارتىپ، ىلگەرى جىلجۋعا تىرىسامىز، - دەپ ايتتى اسىلحان.
10-اقپاندا قازاقستان سپورتشىلارى قانداي ناتيجە كورسەتكەنىن جازعان بولاتىنبىز.
اۆتور
ەلميرا ورالبايەۆا
