«اڭساعان ءسابي» باعدارلاماسى ارقىلى 10 مىڭنان استام نارەستە دۇنيەگە كەلدى

بۇل تۋرالى وڭىرلىك كوممۋنيكاتسيالار قىزمەتىندە وتكەن باسپاءسوز ءماسليحاتىندا «ەكومەد» كلينيكاسى مەن حالىقارالىق «New Generation Clinic» (NGC) ورتالىعىنىڭ ديرەكتورى مارات وتاربايەۆ مالىمدەدى.

ەمبريولوگتىڭ ايتۋىنشا، قازىر ەلدە ەكو جاسايتىن 30 كلينيكا بار. ونىڭ باسىم بولىگى مىندەتتى الەۋمەتتىك مەديتسينالىق ساقتاندىرۋ (م ءا م س) جۇيەسىنە قاتىسادى.

- 2021 -جىلى مەملەكەت باسشىسىنىڭ تاپسىرماسىمەن «اڭساعان ءسابي» باعدارلاماسى ىسكە قوسىلدى. كەيىنگى ءتورت جىل ىشىندە، ياعني، وسى باعدارلاما باستالعاننان بەرى رەسپۋبليكا بويىنشا 10 مىڭنان استام ءسابي جاتىردان تىس ۇرىقتاندىرۋ ارقىلى دۇنيەگە كەلدى، - دەيدى ول.

رەپرودۋكتولوگ ايگەرىم احمەتوۆانىڭ ايتۋىنشا، الماتىدا 240-تان استام ايەل ەكو پروتسەدۋراسى ارقاسىندا انا اتاندى.

- سوڭعى ءتورت جىلدا «اڭساعان ءسابي» باعدارلاماسى اياسىندا 28 مىڭ ەكو شاراسى جاسالىپ، سونىڭ ارقاسىندا 10 مىڭنان استام بالا دۇنيەگە كەلدى. الماتىدا بۇل باعدارلاما 562 ايەلدى قامتىسا، ونىڭ 246-سى انا اتاندى، - دەدى رەپرودۋكتولوگ.

سپيكەرلەردىڭ سوزىنشە، قازاقستانداعى ەرلى-زايىپتىلاردىڭ %16-17- ى بالا كوتەرۋدە قيىندىقتارعا تاپ بولادى.

- قازىر سكرينينگ باعدارلاماسىن ەنگىزۋ كەرەك. ويتكەنى، جاستار اراسىندا اۋرۋدى جانە ونىڭ تۋىنداۋىنا اسەر ەتەتىن فاكتورلاردى ەرتە انىقتاۋعا مۇمكىندىك بەرەتىن مەديتسينالىق زەرتتەۋلەر جيىنتىعى جوق. جاس قىز-جىگىتتەر وزدەرىنىڭ رەپرودۋكتيۆتىك پوتەنتسيالىن بىلمەيدى. ماسەلەن، اتا-انا اتانعىسى كەلەتىن جۇپتار ءتۇرلى دارىگەرلەرگە، حالىق ەمشىلەرىنە بارىپ، ەشقانداي ناتيجە شىقپاعانان كەيىن ەكو تەحنولوگياسىنا جۇگىنەدى. وسى ۋاقىت ىشىندە ولار ءبىراز ۋاقىتتى جوعالتادى. ەكستراكورپورالدى ۇرىقتاندىرۋ پروتسەدۋراسىنىڭ وزىندىك تالاپتارى بولادى، - دەپ اتاپ ءوتتى مارات وتاربايەۆ.

ەسكە سالايىق، بۇعان دەيىن «اڭساعان ءسابي» باعدارلاماسى 2030-جىلعا دەيىن جالعاساتىنى تۋرالى جازعان بولاتىنبىز.

اۆتور

الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى