اڭساعان ءسابي باعدارلاماسى 3 جىلدا 7 مىڭ نارەستەگە ءومىر سىيلادى
استانا. KAZINFORM - حالىقارالىق بالالاردى قورعاۋ كۇنىندە استاناداعى «ەكومەد» ورتالىعىندا «اڭساعان ءسابي» باعدارلاماسىنىڭ 3 جىلداعى جۇمىسىن قورىتىندىلاعان ەرەكشە فەستيۆال ءوتتى.
اتالمىش ءىس-شاراعا ەلىمىزدىڭ ءار ايماعىنان ەلورداداعى ماماندارعا پەرزەنت ءسۇيۋ ماقساتىمەن كەلىپ، دەگەنىنە جەتكەن 100 دەن استام اتا- انا ءبىر-بىرىمەن قاۋىشىپ، كوكەيدەگى قۋانىشىن كوپپەن ءبولىستى.
مەرەكەلىك كەشتە قازاقستاندا دەنەدەن تىس ۇرىقتاندىرۋ زەرتحاناسىنىڭ نەگىزىن قالاعان سالتانات بايقوشقاروۆا، دەنساۋلىق ساقتاۋ ءمينيسترى اقمارال ءالنازاروۆا ءسوز سويلەپ، بالالار مەن اتا-انالاردى مەرەكەمەن قۇتتىقتادى.
«بۇل جەرگە 2020 -جىلدان بەرى ىسكە اسىرىلا باستاعان «اڭساعان ءسابي» باعدارلاماسىنىڭ مول ناتيجەسىنىڭ ءبىر بولىگىن عانا كورۋگە كەلدىك. كەيىنگى ءۇش جىلدىڭ ىشىندە، ياعني، وسى باعدارلاما باستالعاننان بەرى رەسپۋبليكا بويىنشا 7 مىڭنان استام ءسابي جاتىردان تىس ۇرىقتاندىرۋ ارقىلى دۇنيەگە كەلدى. وعان دەيىن بيۋدجەتتەن مۇنداي تاسىلمەن ۇرپاق سۇيگىسى كەلەتىندەرگە 1000 كۆوتا بەرىلىپ كەلسە، پرەزيدەنت تاپسىرماسىمەن كۆوتا سانى 7 ەسە ارتتىرىلعانىن بىلەسىزدەر. ول كەزدە كەزەك كۇتەتىن اتا-انالاردىڭ سانى كوپ بولاتىن. كەزەك ۋاقىتى 7-8 جىلعا دەيىن سوزىلاتىن. قازىر جىل سايىن 7 مىڭ كۆوتا ءبولىنىپ وتىرعاندىقتان كەزەك مەرزىمى 12 ايعا دەيىن قىسقارىپ وتىر. بۇل حالىقارالىق مەجەمەن العاننىڭ وزىندە جاقسى كورسەتكىش»، - دەدى مينيستر ب ا ق وكىلدەرىنە بەرگەن سۇحباتىندا.
سونداي-اق ول «اڭساعان ءسابي» باعدارلاماسىنىڭ تيىمدىلىگى دە حالىقارالىق مەجەنىڭ ەڭ جاقسى دەگەن كورسەتكىشتەرىنە ساي ەكەنىن ايتادى.
«مەن ايتقان ءۇش جىلدا 21 مىڭ كۆوتا بەرىلسە، سونىڭ ىشىندە 7 مىڭ كۆوتا جەمىسىن بەرىپ، دەنى ساۋ بالانى ومىرگە اكەلگەن. بۇل دا حالىقارالىق كورسەتكىشتەرمەن سالىستىرساق الدەقايدا جاقسى كورسەتكىش. «ەكومەد» ورتالىعىنىڭ ماماندارى، رەپرودۋكتولوگ عالىمدار، اتا-انالار «اڭساعان ءسابي» باعدارلاماسىنىڭ تيىمدىلىگىن ايتىپ، ءبىرقاتار ۇسىنىسىن جەتكىزدىك. ونىڭ كوبى تاريف كولەمى مەن قۇنىنا بايلانىستى. ءبارىن ماماندارمەن اقىلداسا وتىرىپ شەشۋگە بولادى دەپ ەسەپتەيمىن. پرەزيدەنت قاسىم-جومارت توقايەۆتىڭ تاپسىرماسىمەن قولعا العان بۇل باعدارلامانىڭ قولجەتىمدىلىگىن حالىق تا سەزىپ وتىر. ماماندار دا جەتكىلىكتى. وسى ماسەلە بويىنشا ورتالىق ازيادا كوشباسشىعا اينالدىق. شەتەلدەن كەلىپ جاتقان قوناقتار دا از ەمەس»، - دەدى اقمارال ءالنازاروۆا.
فەستيۆالدەن كەيىن مينيستر ا. ءالنازاروۆا مەن «ەكومەد» كلينيكالار توبىنىڭ استاناداعى ورتالىعىنىڭ مەديتسينالىق ديرەكتورى الماز يبراگيموۆ «اڭساعان ءسابي» اياسىندا ومىرگە كەلگەن ەكى بالانىڭ تۇساۋىن كەستى.
اۆتور
ەسىمجان ناقتىباي
