اسا ءىرى مولشەردە الاياقتىق جاسادى دەگەن كۇدىكتى رەسەيدەن ەلگە جەتكىزىلدى
استانا. KAZINFORM - تاعىلعان ايىپ بويىنشا وعان مۇلكىن تاركىلەي وتىرىپ، 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان، دەپ حابارلايدى باس پروكۋراتۋرا.
قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا رەسەي فەدەراتسياسىنان اسا ءىرى مولشەردە الاياقتىق جاسادى دەگەن كۇدىكپەن قىلمىستىق جاۋاپكەرشىلىككە تارتۋ ءۇشىن قازاقستاندىق ازامات ەكستراديتسيالاندى.
اتالعان تۇلعا 2017 -جىلى جالعان فيرما قۇرىپ، كونتراگەنتكە بيتۋم جەتكىزۋ بويىنشا جالعان كوممەرتسيالىق ۇسىنىس جىبەرگەن.
بيزنەس سۋبەكتىسىنەن 50 ميلليون تەڭگە العان ول قىلمىستىق جاۋاپكەرشىلىكتەن جالتارۋ ماقساتىندا جاسىرىنعان، وسىعان بايلانىستى حالىقارالىق ىزدەۋ جاريالانعان.
- وتكەن جىلدىڭ قازان ايىندا كۇدىكتى رەسەي فەدەراتسياسىنىڭ ورلوۆ وبلىسىندا ۇستالىپ، كەيىن قازاقستاننىڭ باس پروكۋراتۋراسىنىڭ سۇرانىسى بويىنشا وتانىنا ەكستراديتسيالاندى.
تاعىلعان ايىپ بويىنشا وعان مۇلكىن تاركىلەي وتىرىپ، بەس جىلدان ون جىلعا دەيىن باس بوستاندىعىنان ايىرۋ جازاسى قاراستىرىلعان، - دەلىنگەن حابارلامادا.
وسىعان دەيىن 100 ميلليون تەڭگەدەن استام قارجىنى جىمقىردى دەگەن كۇدىكتى گەرمانيادان ەكستراديتسيالانعانىن حابارلاعان ەدىك.
