اس ءۇيدى تازا ۇستاۋدىڭ ەڭ ءتيىمدى جولدارى قانداي؟
استانا. KAZINFORM - اس ۇيدەگى بارلىق بەتتەر - قابىرعالار، ۇستەل ءۇستى، تۇرمىستىق تەحنيكا، ەدەن - ۇنەمى لاستانۋعا بەيىم. ماي مەن كىر قايتا-قايتا جينالىپ قالعىسى كەلگەنىمەن، اس ءۇيدى تازا كۇيىندە ۇستاۋ قيىن ەمەس. كەز كەلگەن ءۇي يەسى كۇندەلىكتى از ۋاقىت ءبولىپ تازالاۋ دەمالىس كۇنىن تولىق تازالىققا جۇمساۋدان الدەقايدا ءتيىمدى ەكەنىن راستايدى. اس ءۇيدى تازا ۇستاۋدىڭ بىرنەشە ەرەجەسىن ۇسىنامىز، - دەپ حابارلايدى Massaget.kz ءتىلشىسى.
اس ءۇي سورەلەرى مەن توڭازىتقىشتى تەكسەرۋ ارقىلى مەرزىمى وتكەن نەمەسە بۇزىلعان ونىمدەردى ۋاقىتىندا انىقتاۋعا بولادى. بۇل تەك تازالىقتىڭ عانا ەمەس، جاعىمسىز يىستەردىڭ دە الدىن الۋعا كومەكتەسەدى. وسى قاراپايىم ەرەجەلەردى ۇستانىڭىز: كوكونىستەر مەن جەمىستەردى ساقتار الدىندا قۇرعاق شۇبەرەكپەن ءسۇرتىپ قويىڭىز، ويتكەنى ىلعال ونىمدەر تەز ءشىري باستايدى. شۇجىق ونىمدەرىن پلەنكاعا نەمەسە قاعازعا وراپ ساقتاڭىز. سالاتتار مەن باسقا دا تاعامداردى كونتەينەرلەرگە سالىپ نەمەسە تاعامدىق پلەنكامەن جاۋىپ قويىڭىز. ەگەر توڭازىتقىشتان جاعىمسىز ءيىس شىقسا، سورەگە بىرنەشە تابلەتكا بەلسەندىرىلگەن كومىر قويىڭىز - ول قاجەتسىز «حوش يىستەردى» ءسىڭىرىپ الادى.
كىردىڭ جينالۋىن كۇتپەڭىز
لاس داقتار نەعۇرلىم ۇزاق تۇرسا، ولاردى كەتىرۋ سوعۇرلىم قيىن بولادى. سوندىقتان نەگىزگى ەرەجە - كۇندەلىكتى شاعىن تازالىق جاساۋ.
الدىمەن بارلىق بەتتەردەن شاڭ مەن كىردى قۇرعاق شەتكامەن تازالاڭىز. لاس جەرلەرگە اس ۇيگە ارنالعان تازارتقىش قۇرالداردى سەۋىپ، جۋۋ نۇسقاۋلىعىنا سايكەس ءسۇرتىپ الىڭىز. ىدىستى جۋعاننان كەيىن ۇستەل ءۇستىن، شكافتاردىڭ ىشكى جانە سىرتقى بولىكتەرىن دىمقىل شۇبەرەكپەن ءسۇرتىڭىز. بۇرىشتاردا، كران نەگىزىندە جانە باسقا دا قيىن قولجەتەتىن جەرلەردە ەسكىرگەن داقتار بولسا، ولاردى ەسكى ءتىس شەتكاسىنىڭ كومەگىمەن تازالاۋعا بولادى. تۇرمىستىق تەحنيكانى قولدانعاننان كەيىن بىردەن ءسۇرتىپ وتىرىڭىز. بۇل مۋلتيپىسىرگىشكە، پەشكە، پليتاعا دا قاتىستى. تۇراقتى دىمقىل تازالاۋ بار-جوعى 10-15 مينۋت ۋاقىتىڭىزدى الادى، ءبىراق ءسىزدى قاتتى كىردەن جانە كوپ تازالاعىش قۇرالداردى پايدالانۋدان قۇتقارادى.
ىدىستى تاماقتان كەيىن بىردەن جۋۋ
تاماقتان كەيىن بىردەن ىدىس جۋۋ - ۋاقىتتى ۇنەمدەۋدىڭ ەڭ جاقسى ءادىسى. ەگەر بىرنەشە ساعات كۇتىپ، كەپكەن تاعام قالدىقتارىن جۋاتىن بولساڭىز، ەكى ەسە كوپ كۇش جۇمساۋعا تۋرا كەلەدى. اس ۇيدە كوپ تاپسىرمانى قاتار ورىنداۋعا بولادى. مىسالى، تاماق دايىنداپ جاتىپ، ىدىستى جۋىپ، ۇستەل ءۇستىن نەمەسە تەرەزە الدىن ءسۇرتىپ الۋعا بولادى.
تاماق دايىنداۋ بارىسىندا ىدىستاردى رەتىمەن جۋىپ وتىرىڭىز: ىرىمشىكتى تۋرادىڭىز با؟ پىشاق پەن تاقتايدى بىردەن جۋىڭىز. سپاگەتتي قايناتىپ، سۋدى توكتىڭىز بە؟ كاستريۋلدى راكوۆيناعا قويماي، بىردەن جۋىپ تاستاڭىز. وسىلايشا، راكوۆيناڭىز ءاردايىم تازا جانە بوس تۇرادى.
كومەكشى قۇرالداردى پايدالانۋ
اس ۇيدەگى تازالىقتى ساقتاۋعا كومەكتەسەتىن قاراپايىم كومەكشىلەر: تازالاعىش قۇرالدار - ەسكى داقتاردى جىلدام كەتىرەدى. شاعىن تۇرمىستىق تەحنيكا - مىسالى، شىنى تازالاعىش قۇرىلعى پليتكا مەن تەرەزەنى جۋۋ ۋاقىتىن قىسقارتادى.
قاعاز سۇلگىلەر - توگىلگەن سۇيىقتىقتى سۇرتۋگە، ستاكانداردى جىلتىراتۋعا، ۇساق كىرلەردى كەتىرۋگە تاپتىرماس كومەكشى. قاراپايىم سىپىرعىش - كۇندەلىكتى تازالىقتا تاپتىرماس قۇرال. وسى قاراپايىم كەڭەستەردى ۇستانا وتىرىپ، اس ءۇيىڭىزدى ۇنەمى تازا ءارى جيناقى كۇيدە ساقتاي الاسىز!
