ارىستانبەك مۇحامەدي ۇلىنىڭ تۋىسى جەردى ءوز بەتىنشە باسىپ الدى دەپ ايىپتالىپ جاتىر

تەلەارنا مالىمەتىنشە، الماتى وبلىسىندا ەكس-مادەنيەت ءمينيسترى ارىستانبەك مۇحامەدي ۇلىنىڭ وتباسى توڭىرەگىندە جانجال شىعىپ جاتىر. بۇرىنعى ءمينيستردىڭ اپكەسى جەردى ءوز بەتىنشە باسىپ الدى دەپ ايىپتالىپ وتىر. تۇزدىباستاۋ اۋىلىنىڭ تۇرعىندارى جولسىز قالعاندارىن ايتىپ وتىر. ولاردىڭ ايتۋىنشا، جول بويىندا جىلقىلارعا ارنالعان اعاش قورا پايدا بولعان. وننان اسا وتباسى كورشىسىنىڭ كەسىرىنەن زارداپ شەگىپ جاتىر دەيدى جەرگىلىكتى تۇرعىندار. ادامدار كولىكتەرىن تاستاپ، جاياۋ جۇرۋگە ءماجبۇر. دارىگەرلەر دە، ءورت سوندىرۋشىلەر دە وتە المايدى.

«ءبىز كولىكتى باسقا جولعا قالدىرامىز. قازىر كورشىلەر ءبارى قورشاۋ قويىپ جاتىر. جاقىندا قورشاۋلاردان سەكىرىپ وتەتىن شىعارمىز. بارلىعىن قورشاعانمەن قويماي، مال ۇستايدى، تۇندە قالدىقتاردى شىعارادى، دەمالۋ مۇمكىن ەمەس. جول دا جوق. ءبىز اكىمدىككە باردىق، پروكۋراتۋراعا جازدىك، سوتقا بەردىك، ءبىراق ءبارى بىزدەن باس تارتقان سياقتى»، - دەيدى جەرگىلىكتى تۇرعىن ەلەنا سوكولوۆا.

تۇزدىباستاۋ اۋىلى تۇرعىندارىنىڭ ايتۋىنشا، جالپىعا ورتاق جولدى ەكس-مادەنيەت ءمينيسترى ارىستانبەك مۇحامەدي ۇلىنىڭ تۋىستارى قورشاپ العان.

«بۇل ءۇيدىڭ يەسى ارىستانبەك مۇحامەدي ۇلىنىڭ اپكەسى. ولار بۇل جەردى زاڭسىز يەمدەنىپ الدى دەپ ويلايمىن، سەبەبى بۇل اۋماق زيراتتىڭ سانيتارلىق-قورعاۋ ايماعى بولىپ سانالادى. ەرەجەگە سايكەس اراقاشىقتىق 400 مەتردەن كەم بولماۋى كەرەك. ونىڭ ۇستىنە سۋ قورعاۋ ايماعى دا بار»، - دەيدى جەرگىلىكتى تۇرعىن ەرمۇحامەد مارالبەك.

ك ت ك مالىمەتىنشە، ءۇي يەسى اشۋلى كورشىلەرىنە شىعىپ، ارىستانبەك مۇحامەدي ۇلىنىڭ اپكەسى سوندا تۇراتىنىن راستاعان. ال ءوزى ونىڭ كۇيەۋى ەكەنىن ايتتى.

«وسىدان 15 جىل بۇرىن وسىندا كوشىپ كەلگەنىمدە مۇندا شارۋا قوجالىعى بولاتىن. وسى جەرگە ءوزىم جول سالدىم. ءبىر كۇنى كورشىم كەلىپ، ونىڭ اۋماعىنا ءوتىپ كەتكەنىمدى ايتتى. باسقالار جوسپاردى وزگەرتىپ جىبەرىپتى. ولار مەنى جىلجىتىپ تاستاعان. ءبىراق بۇل جەردىڭ ءبارى مەنىكى. جەر ماعان تيەسىلى. مەن ادۆوكات جالدادىم. جولدى اشپايمىن. سوتتىڭ شەشىمىن كۇتەمىن»، - دەيدى ول.

جانجالعا اۋىلدىق وكرۋگ اكىمدىگى پىكىر ءبىلدىردى.

«ول تۇرعىن مەملەكەت مۇلكىن باسىپ الىپ، قورشاپ سالعان. وسى ۋاقىتقا دەيىن نە بولعانىن بىلمەيمىن. ءبىز ەكى-ءۇش رەت سوتقا تاپسىردىق. ءبىراق بارلىق جەردە باس تارتتى»، - دەدى تۇزدىباستاۋ اۋىلدىق وكرۋگى اكىمنىڭ ورىنباسارى گاۋحار بىلىبايەۆا.

جەرگىلىكتى بيلىك جەر ينسپەكتسياسى جاعدايدى جاقىن ارادا رەتكە كەلتىرەدى دەپ سەندىرەدى. ال ەگەر ولار جولدىڭ زاڭسىز جابىلعانىن دالەلدەسە، جاۋاپتىلارعا ءىرى كولەمدە ايىپپۇل سالىنادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى