ارىستانبەك مۇحامەدي ۇلىنىڭ ايەلىنىڭ ۇكىمى قايتا قارالىپ، بوساپ شىقتى

بۇعان دەيىن استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى 13-اقپاندا ۇشەۋىن سوتتاعان:

ارىستانبەك مۇحامەدي ۇلى ق ك- ءنىڭ اسا ءىرى مولشەردە پارا الۋعا ارەكەتتەنگەنى ءۇشىن (24-باپتىڭ 3-بولىگى - 367-بابىنىڭ 4-بولىگى) جانە ق ك 58-بابىنىڭ 3 جانە 6-بولىگى نەگىزىندە قىلمىس جيىنتىعى بويىنشا الدىڭعى سوت ۇكىمىمەن بىرگە 11 جىلعا باس بوستاندىعىنان ايىرىلىپ، مەملەكەتتىك قىزمەت اتقارۋعا ءومىر بويىنا تىيىم سالىندى.

ونىڭ زايىبى گ. يسكاكوۆا پارا الۋ بويىنشا دەلدالدىق جاساعانى ءۇشىن (ق ك 368-بابىنىڭ 1-بولىگى) 6 ايعا باس بوستاندىعىنان ايىرىلدى.

ادۆوكاتى م. تولەيەۆ اسا ءىرى كولەمدە الاياقتىق جاساعانى ءۇشىن (ق ك 190-بابىنىڭ 4-بولىگىنىڭ 2-تارماعى) 10 جىلعا ادۆوكاتتىق قىزمەتپەن اينالىسۋ قۇقىعىنان ايىرا وتىرىپ، 6 جىل 8 ايعا سوتتالعان ەدى.

ءبىرىنشى ساتىداعى سوت ا. مۇحامەدي ۇلىنىڭ 2022-جىلدىڭ جەلتوقسان ايىندا استانا قالاسىنىڭ تەرگەۋ يزولياتورىندا جاتىپ، ايەلى گ. يسكاكوۆانى دەلدال رەتىندە پايدالانىپ، ادۆوكاتى م. تولەيەۆ ارقىلى لاۋازىمدى تۇلعالارعا قاماۋدان بوساتۋ جانە «ديپلومات» قوناق ءۇيىنىڭ مەنشىك قۇقىعىن ساقتاۋ ءۇشىن اسا ءىرى كولەمدە پارا بەرمەك بولعانىن انىقتادى.

2022-جىلعى جەلتوقساننان باستاپ 2023-جىلعى ماۋسىمعا دەيىن ەلوردانىڭ ءارتۇرلى جەرلەرىندە گ. يسكاكوۆا م. تولەيەۆكە جالپى سوماسى 400 مىڭ ا ق ش دوللارىن جانە 27 ميلليون تەڭگە بەرگەن، بۇل اقشانى ادۆوكات م. تولەيەۆ الداۋ جانە سەنىمگە قيانات جاساۋ ارقىلى يەمدەنگەن.

سوت ۇكىمىنە سوتتالۋشىلار مەن ولاردىڭ قورعاۋشىلارى شاعىم ءتۇسىردى.

اپەللياتسيا سوتى سوتتالعانداردىڭ كىناسى دالەلدەندى دەگەن سوت قورىتىندىسىمەن كەلىستى. الايدا ءبىرىنشى ساتىداعى سوتتا گ. يسكاكوۆانىڭ ارەكەتى پارا الۋدا دەلدالدىق جاساۋى تولىق اياقتالعان قۇرام رەتىندە دۇرىس سارالانباعان.

جوعارعى سوتتىڭ 2015-جىلعى 27-قاراشاداعى جەكەلەگەن سىبايلاس جەمقورلىق قىلمىستارىن قاراۋ تاجىريبەسى تۋرالى  8-نورماتيۆتىك قاۋلىسىنىڭ 18-تارماعىنىڭ تۇسىندىرمەسى نەگىزىندە دەلدالدىڭ (گ. يسكاكوۆا) ارەكەتى اقشا تىكەلەي پارا الۋشىنىڭ، ياعني لاۋازىمدى ادامنىڭ جەكە وزىنە بەرىلگەندە عانا اياقتالعان قىلمىس سانالادى.

بۇل جاعدايدا پارا الۋشى بولماعان، ويتكەنى م. تولەيەۆ الداۋ جانە سەنىمگە قيانات جاساۋ ارقىلى اقشا يەمدەنگەن، ياعني الاياقتىق جاساعان.

وسىلايشا ا. مۇحامەدي ۇلىنىڭ ارەكەتىنە ۇقساس گ. يسكاكوۆانىڭ دەلدالدىق ارەكەتى وعان قاتىستى ەمەس ءمان-جايعا بايلانىستى اياقتالماعان، ويتكەنى ولار لاۋازىمدى ادامدارعا اقشانى پارا رەتىندە بەرۋدى كوزدەمەگەن م. تولەيەۆكە الدانىپ قالعان.

اپەللياتسيالىق ساتى گ. يسكاكوۆانىڭ ارەكەتىن اياقتالعان قىلمىستان پارا الۋ بويىنشا وقتالۋ (ق ك 24-بابىنىڭ 3-بولىگى، 368-بابىنىڭ 1-بولىگى) ساناتىنا اۋىستىردى، ءبىراق بۇرىن تاعايىندالعان 6 ايعا باس بوستاندىعىنان ايىرۋ جازاسىن وزگەرىسسىز قالدىردى.

سونىمەن بىرگە بىلتىر 5-شىلدەدەن باستاپ گ. يسكاكوۆانىڭ ءۇي قاماقتا ۇستاۋ مەرزىمىن ەسكەرە وتىرىپ، ۇكىم زاڭدى كۇشىنە ەنگەنگە دەيىن ءبىر تاۋلىككە باس بوستاندىعىنان ايىرۋ تۇرىندەگى ەكى تاۋلىككە قاماۋعا الۋ ەسەبىمەن گ. يسكاكوۆانىڭ 6 ايعا باس بوستاندىعىنان ايىرۋ جازاسى وتەلگەن دەپ ەسەپتەلدى.

وسىلايشا اپەللياتسيالىق سوتتىڭ قاۋلىسىمەن ا. مۇحامەدي ۇلىنا جانە م. تولەيەۆكە قاتىستى ۇكىم وزگەرىسسىز قالدى، ال گ. يسكاكوۆانىڭ ۇكىمى وزگەردى.

ۇكىم زاڭدى كۇشىنە ەندى.

ەسكە سالا كەتەيىك، ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى 2022-جىلى 28-مامىردا قاماۋعا الىنعان ەدى.

انتيكور مۋزەي باسشىسىنا «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ بارىسىندا قارجى جىمقىردى دەگەن ايىپ تاقتى.

ال ونىڭ ايەلىنە پارا بەرۋدەگى - دەلدالدىق، ادۆوكاتىنا - اسا ءىرى مولشەردەگى الاياقتىق جاسادى دەگەن ايىپ تاعىلدى.

دەگەنمەن ارىستانبەك مۇحامەدي ۇلى سوتتا كىناسىن مويىندامادى.

سونداي-اق سوت ارىستانبەك مۇحامەدي ۇلىن ءۇي قاماققا اۋىستىرۋدان باس تارتتى.

بيىل 13-اقپاندا ول 11 جىلعا باس بوستاندىعىنان ايىرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى