ارىستا اسكەري بولىمدە ءۇش ادام كوز جۇمدى، تاعى ەكەۋى اۋىر جاعدايدا جاتىر
استانا. KAZINFORM - بۇگىن، 5-شىلدەدە ارىس قالاسىنداعى اسكەري ءبولىم اۋماعىندا كارىز جۇيەسىنە قىزمەت كورسەتۋ مەن تازالاۋ كەزىندە كارىز گازىمەن ۋلانۋ سالدارىنان ءۇش ادام قازا تاپتى. بۇل جايىندا قورعانىس مينيسترلىگىنەن حابارلاندى.
ونىڭ ىشىندە ەكى ازاماتتىق تۇلعا جانە ءبىر كەلىسىمشارت بويىنشا اسكەري قىزمەتشى بار.
وقيعا جۇمىس بارىسىندا ابايسىزدا قۇدىققا قۇلاپ كەتكەن شىمكەنت اۋداندىق پايدالانۋ ءبولىمىنىڭ جۇمىسشىسىن قۇتقارۋ كەزىندە بولدى.
وعان كومەككە كەلگەن تاعى ەكى جۇمىسشى مەن كەلىسىمشارت بويىنشا ەكى اسكەري قىزمەتشى دە جاعدايىنىڭ ناشارلاۋىنا بايلانىستى جوعارىعا كوتەرىلىپ شىعا المادى.
ناتيجەسىندە ءۇش ادام سول جەردە قازا تاپتى.
تاعى ءبىر جۇمىسشى مەن اسكەري قىزمەتشى ارىس قالاسىنىڭ اۋرۋحاناسىنا جەتكىزىلدى.
قازىرگى تاڭدا ولاردىڭ جاعدايى تۇراقتى اۋىر دەپ باعالانىپ وتىر.
قورعانىس مينيسترلىگىنىڭ باسشىلىعى مەن قارۋلى كۇشتەردىڭ جەكە قۇرامى قازا تاپقانداردىڭ تۋىستارى مەن جاقىندارىنا قايعىسىنا ورتاقتاسىپ كوڭىل ايتادى.
ولاردىڭ وتباسىنا بۇكىل قاجەتتى كومەك كورسەتىلەدى.
اتالعان فاكتى نەگىزىندە ق ر ءى ءى م ءا ت ب شىمكەنت ءبولىمى ق ر ق ك 156-بابى 4-بولىگى بويىنشا سوتقا دەيىنگى تەرگەۋ باستادى (ەڭبەكتى قورعاۋ ەرەجەلەرىن بۇزۋ).
