ارىقتاۋعا ارنالعان پرەپاراتتان قانداي قاۋىپ بار

GPP-1 رەتسەپتورلارىنىڭ اگونيستەرى قانت ديابەتىن ەمدەۋگە دە، سالماق تاستاۋ ءۇشىن دە تانىمال بولعان سايىن، عالىمدار پرەپاراتتىڭ ىقتيمال جاناما اسەرىن مۇقيات زەرتتەپ جاتىر. جاقىندا جۇرگىزىلگەن ءبىرقاتار زەرتتەۋ سەماگليۋتيد پەن NAION اراسىنداعى ىقتيمال بايلانىستى انىقتادى. وسى جاعداي اتالعان پرەپاراتتاردىڭ قاۋىپسىزدىگىن ودان ءارى زەرتتەۋگە سەبەپ تابىلىپ وتىر.

Novo Nordisk NAION (ارتەريالىق ەمەس الدىڭعى يشەميالىق وپتيكالىق نەيروپاتيامەن بايلانىسى) تاۋەكەلىنە قاتىستى پوزيتسياسى Kazinform اگەنتتىگىنىڭ ءتىلشىسى Ozempic، Rybelsus جانە Wegovy شىعاراتىن فارماتسيەۆتيكالىق Novo Nordisk كومپانياسىنا سەماگليۋتيد پەن كوزگە بايلانىستى جاناما اسەرلەر، اتاپ ايتقاندا NAION اراسىنداعى ىقتيمال بايلانىس تۋرالى وتىنىشپەن جۇگىنگەن ەدى. اگەنتتىككە جولداعان ەكسكليۋزيۆتى اقپاراتتا Novo Nordisk ىشكى قاۋىپسىزدىك باعالاۋلارى مەن سىرتقى زەرتتەۋ ناتيجەلەرى تۋرالى ساۋالدارعا جاۋاپ بەرىلگەن.

ولاردىڭ ناتيجەلەرىنە سايكەس، NAION — وتە سيرەك كەزدەسەتىن كوز اۋرۋى، ول سەماگليۋتيدكە نەگىزدەلگەن پرەپاراتتارعا بەكىتىلگەن نۇسقاۋلىقتا جاعىمسىز رەاكتسيالار تىزىمىندە جوق.

— وڭتۇستىك دانيا ۋنيۆەرسيتەتى جۇرگىزگەن زەرتتەۋلەردى، سونداي-اق ءبىزدىڭ ىشكى قاۋىپسىزدىك تەكسەرۋلەرىمىزدى مۇقيات تالداعاننان كەيىن، سەماگليۋتيدتىڭ قاۋپى وزگەرگەن جوق دەپ سانايمىز، - دەدى Novo Nordisk.

زەرتتەۋلەر NAION سالىستىرمالى تاۋەكەلىنىڭ ەكى ەسەلەنگەنىن كورسەتكەنىمەن، ابسوليۋتتى تاۋەكەل وتە تومەن. ءبىر زەرتتەۋ كورسەتكەندەي، جىل بويى سەماگلۋتيد قابىلداعان 10000 ادامنىڭ ىشىندە NAION ەكەۋىنەن بايقالدى، ال سەماگلۋتيدتى قابىلداماعان توپتا اتالعان كورسەتكىش 10000 ادامنىڭ ىشىنەن بىرەۋىندە عانا بولدى. بۇل ناتيجەلەر سالىستىرمالى تۇردە تاۋەكەلدىڭ بارىنا قاراماستان، ءىس جۇزىندە از ەكەنىن كورسەتەدى. سونىمەن قاتار، سەماگلۋتيدتى قابىلداۋ مەن NAION دامۋى اراسىندا بايلانىس جوق.

— ءبىزدىڭ ىشكى قاۋىپسىزدىك تالداۋىمىز جانە راندوميزاتسيالانعان باقىلاناتىن كلينيكالىق سىناقتار، سونىڭ ىشىندە سوقىر ءادىستى قولدانعان وفتالمولوگتىڭ باعالاۋى NAION جاعدايلارىنىڭ وتە از راستالعانىن انىقتادى. وسىعان سۇيەنە وتىرىپ، ءبىز ءدارى- دارمەكپەن بايلانىستى تاۋەكەلدىڭ جوعارىلاۋىن كورمەيمىز، - دەدى Novo Nordisk.

عىلىمي قىزىعۋشىلىق پەن زەرتتەۋ

ارتىق سالماقتان ارىلۋ جانە قانت ديابەتىن ەمدەۋ ءۇشىن كەڭىنەن قولدانىلاتىن GPP-1 اگونيستەرىنىڭ ىقتيمال جاناما اسەرى تۋرالى الاڭداۋشىلىقتىڭ ارتۋىنا بايلانىستى سوڭعى زەرتتەۋلەر، ياعني 2024-جىلدىڭ شىلدەسىندە JAMA Ophthalmology جۋرنالىندا جاريالانعان جۇمىس سەماگليۋتيد پەن NAION اراسىنداعى ىقتيمال بايلانىستى كورسەتەدى. سول جۋرنالداعى تاعى ءبىر زەرتتەۋ سەماگلۋتيدتى نەمەسە تيرزەپاتيدتى قابىلداۋ كەزىندە پاتسيەنتتەردىڭ كورۋ قابىلەتى بۇزىلعان 9 جاعدايدى سيپاتتادى. ولاردىڭ ىشىندە 7 ادامدا NAION دامىدى، بىرەۋى كوزدىڭ ينسۋلتىنا ۇشىرادى، ال ەكىنشىسى كورۋ قابىلەتىن جوعالتپاسا دا، ەكى وپتيكالىق جۇيكەنىڭ ىسىنۋىنە الىپ كەلدى.

دجون ا. موران كوز ورتالىعىنىڭ وفتالمولوگى برەدلي كاتتس جانە زەرتتەۋدىڭ جەتەكشى اۆتورى GPP-1 پرەپاراتتارىنىڭ اسەرىن ودان ءارى زەرتتەۋدىڭ ماڭىزدىلىعىن اتاپ ءوتتى.

— بۇل پرەپاراتتى كوپتەگەن ادام قابىلدايتىندىقتان، ولاردىڭ كوزگە جانە دەنەنىڭ باسقا بولىكتەرىنە اسەرىن باقىلاۋ وتە ماڭىزدى، - دەدى ول.

2023 -جىلى اقش حالقىنىڭ %2-3 اتالعان پرەپاراتتارعا رەتسەپت الدى، دەمەك ونىڭ قاۋىپسىزدىگىن ودان ءارى باقىلاۋ قاجەت.

سەماگليۋتيد — ۇيقى بەزىنىڭ ينسۋلين شىعارۋىن ىنتالاندىرۋ ارقىلى جۇمىس ىستەيدى، قانداعى قانت دەڭگەيىن رەتتەۋگە كومەكتەسەدى. قانت ديابەتىن ەمدەۋدەن باسقا، ول تابەتتى تومەندەتەدى جانە اس قورىتۋدى باياۋلاتادى، دۇرىس تاماقتانۋ مەن فيزيكالىق بەلسەندىلىكپەن بىرگە سالماق جوعالتۋعا ىقپال ەتەدى. الايدا، كەز كەلگەن ءدارى-دارمەك سياقتى كەرى اسەرى بولۋى مۇمكىن، وسى ورايدا دارىگەرمەن كەڭەسۋ كەرەك.

Novo Nordisk كومپانياسى ءۇشىن پاتسيەنتتەردىڭ قاۋىپسىزدىگى — نەگىزگى باسىمدىق.

— ءبىز جاناما اسەرلەر، سونىڭ ىشىندە كوز اۋرۋلارى تۋرالى بارلىق ەسەپكە بايىپتى قارايمىز. بۇل جاعدايلار قانت ديابەتىمەن اۋىراتىن ادامداردا بەلگىلى اسقىنۋ جانە سەماگلۋتيدتى قابىلداۋدى باستاۋ تۋرالى كەز كەلگەن الاڭداۋشىلىقتى دارىگەرمەن تالقىلاۋ كەرەك، - دەپ تولىقتىردى كومپانيا.

سالماق تاستاۋدىڭ بالاما ادىستەرى

GPP-1 رەتسەپتورلارىنىڭ اگونيستەرىنەن باسقا، ادامدار ارىقتاۋ ءۇشىن ءارتۇرلى ءتاسىلدى قولدانادى. جالپى ادىستەردىڭ قاتارىنا ديەتانى وزگەرتۋ، سونىڭ ىشىندە كالوريانى شەكتەۋ، ارالىق ورازا جانە تومەن كومىرسۋتەكتى ديەتالار جاتادى. سالماقتى ازايتۋدا كۇش پەن كارديو جاتتىعۋلار ماڭىزدى ءرول اتقارادى. ال كەيبىرەۋلەر سالماق جوعالتۋعا ارنالعان ءدارى-دارمەكتى جاقسى كورەدى نەمەسە ۇلكەن وزگەرىستەر ءۇشىن بارياتريالىق حيرۋرگياعا جۇگىنەدى. وسى ورايدا مىنەز- قۇلىق تەراپياسى جانە ءومىر سالتى بويىنشا كوۋچينگ پايدالى ادەتتەردى قالىپتاستىرۋعا ىقپال ەتەدى. ارتىق سالماقتى تاستاۋ ستراتەگياسىن تاڭداۋ جەكە قاجەتتىلىكتەرگە نەگىزدەلىپ، مەديتسينالىق مامانداردىڭ باسشىلىعىمەن جۇرگىزىلۋى كەرەك.

وسى ماتەريالدىڭ اعىلشىن تىلىندەگى ءتۇپنۇسقاسىن سىلتەمەگە ءوتىپ وقۋعا بولادى.

ەسكە سالا كەتسەك، وتكەن جىلى سالماق تاستاۋشىلار اراسىندا تانىمال Ozempic پرەپاراتى تۋرالى جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى