پاريج قۇداي انا سوبورى قايتا اشىلادى
استانا. قازاقپارات - 2019-جىلى الاپات ورتتەن زارداپ شەككەن الەمدىك مادەني مۇرا سانالاتىن پاريج قۇداي انا سوبورى ۇزاق ۋاقىتقا سوزىلعان قالپىنا كەلتىرۋ جۇمىستارىنىڭ ناتيجەسىندە، 2024-جىلدىڭ 7-جەلتوقسانىندا قايتا اشىلادى، دەپ حابارلايدى RFI حالىقارالىق فرانسۋز راديوسى.
سوبوردىڭ اشىلۋ سالتاناتىنا 50 دەن استام ەلدىڭ باسشىلارى شاقىرىلعان. فرانسيا پرەزيدەنتى ەممانۋەل ماكرون شارا بارىسىندا ءسوز سويلەيدى.
ا ق ش- تىڭ بۇرىنعى پرەزيدەنتى دونالد ترامپ «Truth Social» پلاتفورماسىندا بۇل شاراعا قاتىساتىنىن راستادى. ال قازىرگى پرەزيدەنت دجو بايدەننىڭ ورنىنا ونىڭ جۇبايى دجيلل بايدەن قاتىسادى.
7-جەلتوقساندا سوبوردا ارنايى اشىلۋ ءراسىمى مەن ءدىني شارالار وتەدى. ال 8-جەلتوقساندا، قاسيەتتى ماريانىڭ مەرەكەسىنە وراي، ۇزاق جىلداردان كەيىن العاش رەت مەسسا وتكىزىلىپ، سوبوردىڭ نەگىزگى بولىگى كوپشىلىككە قولجەتىمدى بولادى. وسى كۇندەرى قاۋىپسىزدىك شارالارى كۇشەيتىلىپ، سوبور ماڭىندا 6000 عا جۋىق پوليتسيا مەن جاندارم قىزمەت اتقارادى.
شارا سوڭىندا الەمگە تانىمال ارتىستەردىڭ قاتىسۋىمەن كونسەرت ۇيىمداستىرىلادى. بۇل مەرەكەلىك كەش فرانسيا تەلەۆيزياسىندا تىكەلەي ەفيردە كورسەتىلەدى.
ايتا كەتەيىك، 2019-جىلعى ورتتەن كەيىن العاش رەت پاريج قۇداي انا سوبورىنىڭ قوڭىراۋلارى سوعىلدى.
پاريج قۇداي انا سوبورى 2024-جىلدىڭ سوڭىندا كەلۋشىلەر مەن قۇلشىلىق ەتۋشىلەرگە اشىلاتىنىن جازعان بولاتىنبىز.
