پاريج-2024: وليمپياداعا 11 جاستاعى سپورتشى قاتىسادى
استانا. قازاقپارات - پاريج وليمپياداسىنا قاتىساتىن ەڭ جاس جانە ەگدە سپورتشى بەلگىلى بولدى. وليمپيادا ويىندارىندا العاش رەت برەيك- دانس بويىنشا جارىس وتەدى. حالىقارالىق وليمپيادا كوميتەتى (ح و ك) مۇنداي شەشىمدى 2018 -جىلى بۋەنوس-ايرەستەگى جاسوسپىرىمدەر وليمپياداسىنان كەيىن قابىلداعان ەدى. بۇل جارىستان ەلىمىزدىڭ نامىسىن قورعايتىن سپورتشىمىز دا بار ەكەنىن ايتا كەتەيىك. ول - ءامىر زاكىروۆ.
وليمپياداعا 11 جاستاعى سپورتشى دا قاتىسادى. قىتايلىق جىڭ حاوحاو سكەيتبورد سپورتىنان سىنعا تۇسەدى. ال وليمپياداداعى ەڭ ەگدە سپورتشىنىڭ جاسى - 65 تە. ول - يسپانيالىق شاباندوز حۋان انتوني حيمەنەس.
ال وليمپيادا ويىندارىنىڭ بويتۇمارى رەتىندە فريگي ەسىمدى قالپاق تاڭدالعان. قالپاق - «فرانسۋز رەسپۋبليكاسىنىڭ ايقىن سيمۆولى»، ال فرانسۋز حالقى ءۇشىن ول - ازاتتىق بەينەسى بولىپ ەسەپتەلەدى.
وليمپيادا قالاشىعى اۋماعى 52 گەكتاردى قۇرايدى. ول سەنت-ۋەن، سەن-دەني جانە يلە سەن-دەني اۋداندارىنىڭ اراسىندا، بۇرىنعى ونەركاسىپتىك شولەيتتەردىڭ ورنىندا جانە ستاد دە فرانس ستاديونىنا جاقىن جەردە ورنالاسقان. قاپلاشىقتا 40 ءتۇرلى تۇرعىن ءۇي، سونداي-اق وقۋ ورىندارى، سپورت زالدارى، ەمحانا جانە دوپينگكە قارسى ورتالىق بار. سپورتشىلارعا 4 مىڭ قىزمەتكەر مەن 1500-گە جۋىق ەرىكتى قولداۋ كورسەتەدى.
دەلەگاتسيالار مىنەتىن قايىقتاردان بولەك سەنا وزەنىندە 86 قايىققا مىنگەن پوليتسيا قىزمەتكەرلەرى جۇمىس ىستەيدى. رەسمي ءىس-شارا الدىندا سۇڭگۋىرلەر مەن كينولوگتار پاريجدەگى نەگىزگى سۋ جولىنىڭ بارلىق تىرەكتەرىن تەكسەرەتىنى، ال اسكەريلەر كۇدىكتى زاتتاردى انىقتاۋ ءۇشىن سۋدا دىبىس داتچيكتەرىن ورناتقان. 13.00-دەن باستاپ 45 مىڭ پوليتسيا مەن جاندارم شەرۋ جولى وتەتىن سەنا بويىنداعى اۋماقتى قورشايدى. قاۋىپسىزدىك ماقساتىندا سەرىكتەس ەلدەردىڭ 1800 پوليتسيا قىزمەتكەرى كومەكتەسەدى.
