پاريج 2024 -جىلعى وليمپياداعا دەيىن اۋە تاكسيىن ىسكە قوسادى
2024 -جىلعى وليمپياداعا دەيىن پاريج اۋە تاكسيى قىزمەتىن ىسكە قوسۋدى جوسپارلاپ وتىر. قازاقپارات بۇل تۋرالى Euronews اگەنتتىگىنە سىلتەمە جاساپ حابارلايدى.
Skyports كومپانياسىنىڭ ەۋروپا جانە تاياۋ شىعىس بويىنشا ينفراقۇرىلىم ءبولىمىنىڭ جەتەكشىسى داميان كيسەليدىڭ ايتۋىنشا، تاكسيگە مىنەتىن ادام اۋەلى تىركەۋگە بارادى.
«تاكسيگە مىنەتىن ءسىز جانە بۇل ءسىزدىڭ ۋاقىتىڭىز ەكەنىنە كوز جەتكىزۋىمىز كەرەك. شاعىن كۇتۋ زالىمىز بار، ۇشۋعا 5 مينۋت قالعاندا سىزدەن اۋە تاكسيىنىڭ بورتىنا كوتەرىلۋدى سۇرايدى. ءسىز بيومەتريا پورتالىنان وتەسىز، بولدى».
تاكسي پاريج ماڭىنداعى بەس ۆەرتيپورتتاردىڭ بىرىنەن ۇشادى. تاعى ءبىر ۇشۋ الاڭى سەناداعى قالقىما بارجادا ورنالاسقان.
اۋەدە ەلەكترلىك تاكسيلەردىڭ ۇشۋىنا ءالى فرانسيا تۇرعىندارى رۇقسات بەرۋى كەرەك. جوباعا قاتىساتىن Aéroport de Paris توبى جاڭا قۇرىلعىلاردىڭ دىبىسى تىكۇشاقتان 4 ەسە تىنىش دەيدى.
ADP اتقارۋشى ديرەكتورى ەدۆارد اركرايت تومەن كومىرتەكتى اۆياتسيا ءتۇرىن ءتۇرلى قىزمەتكە پايدالانۋعا بولاتىنىن ايتادى.
«ءبىز ءبىرىنشى كەزەكتە ادام، سالەمدەمەلەر، اپات جانە مەديتسينا قىزمەتتەرىن تاسىمالداۋدى ويلادىق. ءبىراق ءالى ءبىزدىڭ ويىمىزعا كىرىپ-شىقپاعان سالالار دا بار»، - دەپ اتاپ ءوتتى ول.
اۋە تاكسيىن نەمىستىڭ Volocopter توبى ەكى ورىندىق جەڭىل ۇشاقپەن جەتكىزەدى. ءقازىر كومپانيا اۆياتسيا قاۋىپسىزدىگى بويىنشا ەۋروپا اگەنتتىگىنەن رۇقساتتى كۇتىپ وتىر. Volocopter كوممەرتسيالىق ديرەكتورى جان-كريستوف دراي «ءبىرىنشى كەزەكتەگى مىندەتىمىز - كولىكتى سەرتيفيكاتتاۋ» دەپ اتاپ ءوتتى.
وليمپيادانىڭ اشىلۋىنا ءبىر جىلدان از ۋاقىت قالدى. وسى ارالىقتا كومپانيا رەتتەۋ ورگاندارى مەن بيلىك وكىلدەرىن سەندىرۋى كەرەك.
