اگروونىمدەرىمىز الەمنىڭ 80 نەن استام ەلىنە جەتكىزىلەدى - قاسىم-جومارت توقايەۆ
ريم. KAZINFORM - مەملەكەت باسشىسى قاسىم-جومارت توقايەۆ «قازاقستان-يتاليا» ينۆەستيتسيالىق دوڭگەلەك ۇستەلى بارىسىندا اۋىل شارۋاشىلىعى سالاسىندا بىرلەسكەن ينۆەستيتسيالىق جوبالاردى ءتيىمدى جۇزەگە اسىرۋ ءۇشىن زور الەۋەت بار ەكەنىنە توقتالىپ، يتاليا بيزنەس- ەليتاسىنىڭ نازارىن وسى باعىتقا اۋداردى. بۇل تۋرالى اقوردانىڭ باسپا ءسوز قىزمەتىنەن ءمالىم ەتتى.
«تەرريتوريامىزدىڭ 70 پايىزدان استامى اۋىل شارۋاشىلىعىنا جارامدى. ەلىمىز ورتالىق ازياداعى استىقتى ولكە سانالادى. ءبىز بيداي مەن ۇن ءوندىرۋ بويىنشا الەمدەگى ون ەلدىڭ قاتارىنا كىرەمىز. اۋىل شارۋاشىلىعى ونىمدەرىمىز الەمنىڭ 80 نەن استام ەلىنە جەتكىزىلەدى. الەمدە ازىق- تۇلىك تاپشىلىعى ارتىپ كەلە جاتقانىن ەسكەرە وتىرىپ، ءبىز وسى سەكتوردىڭ ونىمدىلىگىن ءۇش ەسە جانە ەكسپورتتى ەكى ەسە ارتتىرۋدى كوزدەپ وتىرمىز. قازاقستان يتاليالىق سەرىكتەستەرىمەن بىرگە ءداندى جانە مايلى داقىلداردى ءوسىرۋ، سونداي- اق ماكورون، ەت جانە ءسۇت ونىمدەرىن ءوندىرۋ باعىتتارىنداعى ىنتىماقتاستىقتى دامىتۋعا مۇددەلى»، - دەدى پرەزيدەنت.
مەملەكەت باسشىسى دوڭگەلەك ۇستەلگە قاتىسۋشىلاردى بيوتەحنولوگيا، فارماتسيەۆتيكا سالالارىنداعى ينۆەستيتسيالىق مۇمكىندىكتەر تۋرالى حاباردار ەتتى. قاسىم-جومارت توقايەۆ يتاليانىڭ ءبىرقاتار ءىرى كومپانيالارىن قازاقستاندا جەرگىلىكتى ءوندىرىس اشۋعا شاقىردى. بۇدان بولەك، قاسىم-جومارت توقايەۆ IT- سالاسىن دامىتۋدىڭ جانە «استانا» حالىقارالىق قارجى ورتالىعىنىڭ ارتىقشىلىقتارىنا ارنايى توقتالدى.
قاسىم- جومارت توقايەۆتىڭ پىكىرىنشە، ەنەرگەتيكا سالاسى - ەكى ەل اراسىنداعى ەكونوميكالىق ىنتىماقتاستىقتىڭ نەگىزگى باعىتى.
«قازاقستان مۇنايىنىڭ 80 پايىزدان استامى ەۋروپاعا ەكسپورتتالادى. بۇل ەۋروپا وداعىنا قاجەت مۇنايدىڭ شامامەن 10 پايىزىن قامتاماسىز ەتەدى. قازاقستاننىڭ ۇزاق جىلدان بەرگى جانە سەنىمدى ەنەرگەتيكالىق سەرىكتەسى يتالياعا العىس ايتقىم كەلەدى. ءبىز يتاليالىق ENI كومپانياسىنىڭ قازاقستان ەكونوميكاسىنا قوسقان ۇلەسىن جوعارى باعالايمىز. قازاقستان مۇناي مەن گازدى بارلاۋ سالاسىندا مول مۇمكىندىك ۇسىنىپ وتىر. ءبىز ماڭىزدى كەن ورىندارىن اشۋ ماقساتىندا الەمدىك وزىق تاجىريبەنى ەنگىزىپ جاتىرمىز. سونداي- اق يتاليا كومپانيالارىن مۇناي- گاز سالاسىندا سەرۆيستىك قىزمەت كورسەتۋ ىسىنە اتسالىسۋعا شاقىرامىز»، - دەدى مەملەكەت باسشىسى.
جيىن بارىسىندا يتاليا رەسپۋبليكاسى مينيسترلەر كەڭەسى ءتوراعاسىنىڭ ورىنباسارى - سىرتقى ىستەر جانە حالىقارالىق ىنتىماقتاستىق ءمينيسترى انتونيو تاياني، CDP توبىنىڭ باس اتقارۋشى ديرەكتورى داريو سكانناپەكو، Confindustria كومپانياسىنىڭ ينتەرناتسيونالداندىرۋ جونىندەگى ۆيتسە- پرەزيدەنتى باربارا دجاكومەللو، CONFAPI كومپانياسىنىڭ پرەزيدەنتى كريستيان كاميسا، Leonardo SpA توبىنىڭ پرەزيدەنتى ستەفانو پونتەكورۆو، Fincantieri SpA كومپانياسىنىڭ باس اتقارۋشى ديرەكتورى پەرروبەرتو فولگەرو، PetrolValves كومپانياسىنىڭ باس اتقارۋشى ديرەكتورى ساندرو مالكوري، Pietro Fiorentini كومپانياسىنىڭ باس اتقارۋشى ديرەكتورى پاولو ناردي جانە تاعى باسقالار ەكونوميكانىڭ ءتيىستى سالالارى بويىنشا قازاقستانمەن اراداعى ىنتىماقتاستىقتى دامىتۋ پەرسپەكتيۆالارىنا قاتىستى كوزقاراستارىن ءبىلدىردى.
اۆتور
گۇلميرا الياكپاروۆا
