ارتەريالىق گيپەرتونيا كەزىندە قانداي ديەتا ۇستانعان ءجون - كارديولوگ كەڭەسى

پەتروپاۆلداعى «دەنساۋلىق» جەكە كوممەرتسيالىق ەمەس ەمحاناسىنىڭ كارديولوگ دارىگەرى ستانيسلاۆ گيريچيەۆ اۋرۋ جايىندا، ونىڭ الدىن الۋ شارالارى تۋرالى ايتىپ بەردى.

دارىگەردىڭ ايتۋىنشا، ارتەريالىق گيپەرتونيا نەمەسە ارتەريالىق گيپەرتەنزيا - ارتەريالىق قان قىسىمىنىڭ ۇزاق ۋاقىت بويى تۇراقتى تۇردە سىناپ ولشەمىمەن 140/90 م م دەيىن جانە ودان جوعارى كوتەرىلۋى.

«سىرقاتتاردىڭ %90 دەرتتىڭ پايدا بولۋىنا نە سەبەپ ەكەنىن انىقتاۋ مۇمكىن ەمەس. ءبىراق بىزگە گيپەرتونيانىڭ دامۋىنا اسەر ەتەتىن فاكتورلار بەلگىلى، ولار - زياندى ادەتتەر، ەموتسيونالدىق سترەسس، جىنىسى مەن جاسى، ارتىق دەنە سالماعى. ءار ارتىق كيلوگرامم قىسىمدى ورتا ەسەپپەن 1-3 م م دەيىن ارتتىرادى. ارتەريالىق گيپەرتەنزيانىڭ پايدا بولۋ قاۋپى تولىق ادامداردا 2-6 ەسە جوعارى.

ال %5 اۋرۋدىڭ ورشۋىنە نە سەبەپ بولعانى بەلگىلى، ماسەلەن، بۇيرەك اۋرۋى گيپەرتونياعا اكەلۋى مۇمكىن»، - دەيدى ستانيسلاۆ گيريچيەۆ.

دەرتپەن كۇرەستە ەڭ ءبىرىنشى ءومىر ءسۇرۋ سالتىن قايتا قاراعان ءجون. ماماننىڭ ايتۋىنشا، ەڭ باستىسى زياندى ادەتتەر - تەمەكى شەگۋدەن، تەمەكى شەگۋ قان قىسىمىنىڭ 10-30 م م دەيىن جوعارىلاۋىنا اكەلۋى مۇمكىن، باس تارتۋ كەرەك.

«از قوزعالاتىن، كەڭسەدە كوپ وتىراتىن ادامداردا دەنە شىنىقتىرۋمەن اينالىساتىن ادامدارعا قاراعاندا ارتەريالىق گيپەرتونيانىڭ دامۋ ىقتيمالدىعى %20-50 جوعارى.

ارتەريالىق گيپەرتونياعا قارسى پرەپاراتتاردى ءومىر بويىنا ىشۋگە تۋرا كەلەدى. قان قىسىمى دۇرىستالسا دا ەمدى توقتاتۋعا بولمايدى. ءدارى ءىشۋدى توقتاتقان جاعدايدا قايتادان قان قىسىمى كوتەرىلىپ، ينسۋلت، ينفاركت الۋ قاۋپى ارتادى»، - دەيدى ستانيسلاۆ گيريچيەۆ.

ارتەريالىق گيپەرتەنزيا كەزىندە ادامنىڭ كوبىنەسە جەلكە ايماعىندا باسى اۋىرادى، باسى اينالادى، كوزىنىڭ الدىندا قارا داقتار پايدا بولادى، ۇيقىسى بۇزىلىپ، ءجيى ويانۋى مۇمكىن. بۇدان بولەك مازاسى كەتىپ، اشۋلانشاقتىق، شارشاۋ، دەپرەسسيالىق كوڭىل- كۇي پايدا بولادى. كورۋ قابىلەتى بۇزىلىپ، جۇرەك تۇسى اۋىرسىنۋى مۇمكىن.

«قان قىسىمىنىڭ كۇرت جوعارىلاۋىنا كەيدە داعدارىس اسەر ەتۋى مۇمكىن. سونداي- اق جۇيكەگە پسيحيكالىق نەمەسە فيزيكالىق شامادان تىس جۇكتەمە، اۋا- رايىنىڭ وزگەرۋى، مەتەوسەزىمتال جادارعا ماگنيتتىك داۋىلدار، ءجيى تەمەكى شەگۋ، قان قىسىمىن تومەندەتەتىن كەيبىر ءدارى- دارمەكتەردى كۇرت الىپ تاستاۋ، الكوگولدى ىشىمدىكتەردى تۇتىنۋ، تۇزدى جانە تۇندە تاماق ءىشۋ، قان قىسىمىنىڭ جوعارىلاۋىنا ىقپال ەتەتىن زاتتار بار تاعامداردى نەمەسە سۋسىنداردى تۇتىنۋ - كوپ مولشەردە كوفە ءىشۋ، شوكولاد، ىرىمشىك، ۋىلدىرىق جانە ت. ب. جەۋ قان قىسىمىن كوتەرۋى مۇمكىن.

سوندىقتان ارتەريالىق گيپەرتەنزيا كەزىندە ديەتالىق ۇسىنىستاردى ساقتاعان ءجون. ەڭ الدىمەن، ارتىق دەنە سالماعىن قالىپقا كەلتىرۋگە، قالىپتى سالماقتا - ليپيدتەر الماسۋىنىڭ بۇزىلۋىن تۇزەتۋگە باعىتتالۋى كەرەك.

ارتەريالىق گيپەرتەنزيا كەزىندە اس تۇزىن تۇتىنۋدى شەكتەۋ وتە ماڭىزدى، ويتكەنى بۇل قان تامىرلارىنىڭ قابىرعالارىندا ناتري تۇزدارىنىڭ جينالۋى قان تامىرلارىنىڭ تونۋسىنا زياندى اسەر ەتەدى.

تامىرلاردىڭ قابىرعالارىندا تۇزەتىن حولەستەرين مەن باسقا ليپيدتەردىڭ دەڭگەيىن تومەندەتۋگە تىرىسۋ كەرەك. تامىرلاردىڭ قابىرعالارىن نىعايتۋ ءۇشىن س دارۋمەندەرى مەن ءرۋتيندى، مينەرالدى زاتتار - كالتسي مەن ماگني دە تۇتىنۋ ماڭىزدى»، - دەيدى دارىگەر.

ارتەريالىق گيپەرتەنزيا ۇزاق ۋاقىت دۇرىس ەمدەلمەگەن جاعدايدا اسقىنىپ، ينفاركت، ينسۋلت، جۇرەكتىڭ يشەميالىق اۋرۋى، كوزگە قان كەتۋ، وكپە ءىسىنۋى، دەمەنتسيا، جۇرەك، بۇيرەك جەتكىلىكسىزدىگى سياقتى اۋرۋلاردى تۋدىرۋى مۇمكىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى