كيىكتەن قورعاۋ ءۇشىن ەگىستىك جەرلەردى قورشاۋ كەرەك - شارۋا قوجالىعىنىڭ باسشىسى
بۇل تۋرالى كازتالوۆ اۋدانى اقپاتەر اۋىلدىق وكرۋگىندەگى «ەرعوجا» شارۋا قوجالىعىنىڭ باسشىسى سامات حاسانوۆ ايتتى، دەپ حابارلايدى قازاقپارات ءتىلشىسى.
سامات حامزا ۇلىنىڭ ءمالىم ەتكەنىندەي، كيىكتەر بيىل شابىندىق پەن جايىلىمدار ءوز الدىنا، ەگىستىك جەرلەردى تاپتاپ كەتتى.
ونىڭ سوزىنە قاراعاندا، وتكەن جىلى ەكى جاڭبىرلاتقىش ماشينا الىپ، بيىل 160 گەكتار جەرگە سۋدان ءشوبىن ەككەن ەكەن. القاپتىڭ ەلەكتر باقتاشىمەن قورشالعانىنا قاراماستان، كيىكتەر سىمدى بۇزىپ ءوتىپ، ەگىستىكتى وتاپ كەتكەن.
اۋداننان كوميسسيا كەلىپ، اكت تولتىرىپ، شىعىندى ەسەپتەگەن. ەندى وتەماقى تولەنسە دەپ وتىر شارۋا قوجالىعىنىڭ باسشىسى.
«ەڭ الدىمەن، ارينە، كيىك سانىن رەتتەۋ كەرەك. ول ءۇشىن ەت كومبيناتتارىن جانداندىرىپ، كيىكتەن الىناتىن ونىمدەردى وڭدەپ، پايداعا جاراتقان ءجون. ايتسە دە اقبوكەن سانىن قانشا ازايتسا دا، ول كەلەسى جىلى قايتا كوبەيەدى. سوندىقتان كيىك جايىلىمداردا جۇرە بەرسىن، ەڭ بولماسا ەگىستىكتەردى تورمەن، ەكى مەتر سايىن باعان قويىپ، قورشاۋ كەرەك. مىنە، وسىعان ۇكىمەت تاراپىنان دەمەۋقارجى تولەنسە، دۇرىس بولار ەدى. ويتكەنى جىل سايىن وتەماقى تولەگەنشە، بۇل الدەقايدا ءتيىمدى. سۋدان جانە باسقا ەكپەشوپتى وسىرۋگە شارۋا قوجالىقتارىنىڭ باسشىلارى قىزىعۋشىلىق ءبىلدىرىپ، سۇرايدى. ءبىراق ونى جاڭاعىداي جولمەن قورشامايىنشا، ەش ناتيجە بولمايدى»، دەدى قازاقپارات تىلشىسىنە س. حاسانوۆ.
ەسكە سالا كەتەيىك، بۇدان بۇرىن ب ق و- دا شارۋالار كيىككە بايلانىستى توتەنشە جاعداي ەنگىزۋدى سۇراپ وتىرعانىن جازعان بولاتىنبىز.
سونداي- اق ب ق و- نىڭ وڭتۇستىك اۋداندارىندا مال ازىعىن دايىنداۋعا بايلانىستى قيىندىقتار تۋىنداپ وتىر.
ب ق و اكىمى سۋ مەن جول پروبلەماسى، ءۇش اۋىسىمدى مەكتەپتەر، كيىك سانىن رەتتەۋگە بايلانىستى سۇحبات بەردى.
