فۋتبولدان قازاقستان قۇراماسى ۋ ە ف ا اياسىندا تاريحي كورسەتكىشكە قول جەتكىزدى

ەل قۇراماسى بۇعان دەيىن ەۋروپا چەمپيوناتىنىڭ ىرىكتەۋ ساتىسىندا مۇنداي ۇپاي يەلەنگەن ەمەس. اتاپ ايتقاندا، 2008 -جىلى – 10، 2012 -جىلى – 4، 2016 -جىلى - 5، 2020 -جىلى - 10 ۇپاي جيناعان ەدى.

ال ەۋروپا قۇرلىعى بويىنشا الەم چەمپيوناتى ىرىكتەۋ ساتىسىندا 2006 -جىلى – 1، 2010 -جىلى – 6، 2014 -جىلى – 5، 2018 -جىلى – 3، 2022 -جىلى - 3 ۇپايدى مىسە تۇتتى.

الدا ءۇش ويىن بار. بۇل كورسەتكىش ءالى دە جاقسارا تۇسەدى دەگەن ۇمىتتەمىز.

ەسكە سالساق، ەل قۇراماسى 10-قىركۇيەكتە «استانا- ارەنادا» 2024 -جىلعى ەۋروپا چەمپيوناتىنا ىرىكتەۋدىڭ 6-تۋرىندا سولتۇستىك يرلانديانى 1:0 ەسەبىمەن جەڭدى. كەزدەسۋ بارىسىندا 27-مينۋتتا قازاقستاندىق شابۋىلشى ماكسيم سامورودوۆ مەرگەندىگىمەن كوزگە ءتۇستى. بۇل گول قازاقستان قۇراماسىنا ءتورتىنشى مارتە جەڭىس الىپ كەلدى. ماتچتى تريبۋنادان پرەزيدەنت قاسىم-جومارت توقايەۆ تاماشالادى. ويىننان كەيىن مەملەكەت باسشىسى سپورتشىلارىمىزبەن كەزدەسىپ، جەڭىسپەن قۇتتىقتادى.

بۇعان دەيىن ەل قۇراماسى بەس كەزدەسۋ وتكىزگەن ەدى. الدىمەن سلوۆەنيادان 1:2 ەسەبىمەن جەڭىلسە، دانيانى - 3:2، سان- مارينونى - 3:0، سولتۇستىك يرلانديانى - 1:0 ەسەبىمەن قاپى قالدىردى.

قازاقستان قۇراماسىنا 2022 -جىلدىڭ 27-ساۋىرىنەن باستاپ رەسەيلىك باپكەر ماگومەد اديەۆ جەتەكشىلىك ەتىپ كەلەدى. ونىڭ جەتەكشىلىگىمەن فۋتبولشىلار 14 ويىن وتكىزدى. قازىرگە دەيىن ۇلتتىق قۇراما 8 مارتە جەڭىسكە جەتىپ، بىرەۋىندە تەڭ ناتيجە تىركەلدى، بەسەۋىندە قارسىلاسىنا ەسە جىبەردى.

وسى ۋاقىتتاعى تۋرنير كەستەسىندەگى كورسەتكىش بويىنشا قازاقستان 2024 -جىلعى ەۋروپا چەمپيوناتىنا ىرىكتەۋ ساتىسىندا 6 ويىننان كەيىن 12 ۇپايمەن ەكىنشى ورىندا تۇر.

ايتا كەتەيىك، ءدال قازىر قازاقستان ويىن كورسەتەتىن H توبىندا فينليانديا مەن دانيا كەزدەسۋى ءوتىپ جاتىر. ازىرگە ەسەپ - 0:0.

ال ساعات 00.45-تە سلوۆەنيا مەن سولتۇستىك يرلانديا قۇرامالارى جاسىل الاڭعا شىعادى.

ەندى قازاقستان قۇراماسى سىرت الاڭدا 14-قازاندا دانيامەن، 17-قازاندا فينليانديامەن كەزدەسەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى