الماتىداعى كرەماتوري نەگە پايدالانۋعا بەرىلمەي تۇر

كرەماتوريدىڭ ناقتى قاشان اشىلاتىنى بەلگىسىز. الماتى قالاسىنىڭ قۇرىلىس باسقارماسى جوبانىڭ ەكى بولىكتەن: عيمارات پەن ينجەنەرلىك جەلىلەرىن سالۋدان تۇراتىنىن حابارلادى.

«عيماراتتىڭ قۇرىلىس-مونتاج جۇمىستارى 2021-جىلى جەلتوقسان ايىندا اياقتالدى. بۇگىنگى كۇنى كرەماتوريدى پايدالانۋعا بەرۋ ءۇشىن نىسانعا سىرتقى ينجەنەرلىك جەلىلەردى جەتكىزۋدى اياقتاۋ قاجەت. سىرتقى جەلىلەر بويىنشا قۇرىلىس-مونتاجداۋ جۇمىسىن توقتاتا تۇرۋ - كرەماتوريدىڭ جۇمىس ىستەۋى ءۇشىن جوبانى تۇزەتۋگە بايلانىستى بولدى. تۇزەتۋ گاز قۇبىرىنىڭ ماگيسترالدىق تراسساسىنىڭ وزگەرۋىنە (شىعارىلۋىنا) بايلانىستى جۇرگىزىلدى»، - دەپ حابارلادى باسقارمادان.

بەكىتىلگەن جوبالىق-سمەتالىق قۇجاتتاماعا سايكەس، نىسان ەكى اۋىسىمدىق جۇمىس كەزىندە تاۋلىگىنە 23-24 كرەماتسيا وتكىزۋ قابىلەتتىلىگىنە ەسەپتەلگەن. بۇل عيمارات تەك كرەماتسياعا ارنالعان، قوشتاسۋ ءراسىمىن وتكىزۋ مۇمكىندىگى بار ەكىنشى تيپتەگى كرەماتوري بولماق. سونداي-اق، كرەماتوري عيماراتىندا اكىمشىلىك جانە جۇمىسشىلارعا ارنالعان بولمەلەر ورنالاسقان. سونداي-اق، دۋش، كيىم اۋىستىراتىن بولمەلەر، عۇرىپتىق كەرەك-جاراقتار دۇكەنى بار.

«عيماراتتىڭ قۇرىلىس-مونتاجداۋ جۇمىستارى اياقتالعان سوڭ پايدالانۋشى ۇيىم ۋاكىلەتتى ورگاندارمەن كرەماتسيا سالاسىنداعى زاڭنامالىق رەگلامەنتتى (قارجىلاندىرۋ كوزى، كرەماتسيالاۋعا جاتاتىن ازاماتتاردىڭ ساناتى، كرەماتورييدىڭ جۇمىس ىستەۋ قاعيداسى) كەڭەيتۋ بويىنشا جۇمىس جۇرگىزەتىن بولادى»، - دەپ تولىقتىردى ۆەدومستۆودان.

ەسكە سالايىق، الماتى اكىمدىگى كرەماتوريي قۇرىلىسىنىڭ جوبالىق-سمەتالىق قۇجاتتاماسىن جاساۋعا تەندەر جاريالاعان بولاتىن.

كرەماتوريدىڭ قۇرىلىس جۇمىستارى 2021-جىلدىڭ جەلتوقسان ايىندا اياقتالدى. ونى 2022-جىلدىڭ مامىر ايىندا پايدالانۋعا بەرۋ جوسپارلانعان.

الايدا، كرەماتوريدى اشۋ جانە پايدالانۋعا بەرۋ بىرنەشە رەت كەيىنگە قالدىرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى