سەمەيدە يادرولىق سىناق قۇرباندارىن ەسكە الدى
وبلىس اكىمدىگىنىڭ مالىمەتىنە سۇيەنسەك، اكسياعا «نيەۆادا-سەمەي» حالىقارالىق انتيادرولىق قوزعالىسىنىڭ بەلسەندىلەرى، قوعام قايراتكەرلەرى مەن جەرگىلىكتى تۇرعىندار قاتىستى. ولار سەمەيدەگى «ولىمنەن دە كۇشتى» مونۋمەنتىنە گۇل شوقتارىن قويىپ، يادرولىق سىناق قۇرباندارىن ءبىر مينۋت ۇنسىزدىكپەن ەسكە الدى.
اباي وبلىسى اكىمىنىڭ ورىنباسارى شالقار بايبەكوۆ يادرولىق قارۋسىزدانۋ جەر بەتىندەگى بەيبىتشىلىكتى ساقتاۋ جولىنداعى ماڭىزدى قادام بولعاندىعىن اتاپ ءوتتى.
«وتىز ەكى جىل بۇرىن بۇكىل الەمگە بەيبىت ءومىردىڭ جارقىن ۇلگىسىن كورسەتتىك. قازاقستان يادرولىق ارسەنالدان، ەرىكتى تۇردە، باس تارتتى. الايدا پوليگون جاڭعىرىعى ءالى دە حالىق جادىندا، تاريحي دەرەكتە، باسپا ءسوز بەتتەرىندە اۋىق- اۋىق كورىنىس تابادى. ساياسي-مەليتاريستىك باسەكە جولىندا، جازىقسىز جاپا شەگىپ، قۇربان بولعان جەرلەستەرىمىزدىڭ اسقاق رۋحى الدىندا باسىمدى ءيىپ، تاعزىم ەتەمىن!»، - دەدى ول.
شارا اياسىندا حالىقارالىق يادرولىق قارسى ءىس-قيمىل كۇنىنە ارنالعان كورمە قويىلدى. سونداي-اق بۇل كۇنى اباي وبلىسىنىڭ قالالارى مەن اۋداندارىندا ءتۇرلى اكسيا، كورمە، كونفەرەنسيالار ۇيىمداستىرىلدى.
ايتا كەتەيىك، سەمەي پوليگونى وسىدان 32 جىل بۇرىن، 1991-جىلى 29- تامىزدا جابىلدى. وسىلايشا قازاقستان الەمدە العاشقىلاردىڭ ءبىرى بولىپ يادرولىق قارۋدان باس تارتقان ەل بولدى.
