ساموكاتشىلاردىڭ «قارا ءتىزىمى» ءتۇزىلۋى مۇمكىن

ساموكاتتاردى جالعا بەرەتىن كيكشەرينگتىك كومپانيالار جالپى «جوسىقسىز كليەنتتەر ءتىزىمىن» قۇرۋدى ۇسىنىپ وتىر. جول قوزعالىسى ەرەجەلەرىن، جولاۋشىلار مەن جۇكتەردى تاسىمالداۋ ەرەجەلەرىن بۇزاتىن، سكۋتەردى دۇرىس ەمەس جەردە قالدىراتىن پايدالانۋشىلارعا بارلىق كومپانيا ءبىر مەزگىلدە قىزمەت كورسەتۋدەن باس تارتۋى مۇمكىن. سونداي- اق، پوليتسيا پاترۋلى ءۇشىن ەلەكتر سكۋتەرلەرىن پايدالانۋ ۇسىنىلدى، - دەدى ا. بورانوۆا ق ر ءى ءى م اپتالىق بريفينگىندە.

سپيكەردىڭ ايتۋىنشا، سكۋتەر پايدالانۋشىلارى ءۇشىن ارنايى موبيلدى قوسىمشا ارقىلى حابارلامالار جىبەرۋ قاراستىرىلىپ جاتىر. بۇل رەتتە سكۋتەر ارنايى بولىنگەن ورىندارعا قويىلماسا، ساپار اياقتالمايدى (اقى الۋ جالعاسادى) .

جارىقسىز ۋچاسكەلەردە، قالا سىرتىنداعى تراسسالاردا جانە كامەلەتكە تولماعاندارعا ەلەكتر سكۋتەرلەرىن پايدالانۋعا تىيىم سالۋ ۇسىنىلدى. بالالاردىڭ ەلەكتر سكۋتەرلەرىن پايدالانۋىن بولدىرماۋ ءۇشىن سالماق كاتەگوريالارى بويىنشا تىيىم سالۋ ەنگىزىلەدى. مىسالى، 30 كەلىدەن اساتىن قولدانۋشىلارعا عانا رۇقسات بەرىلەدى، - دەدى اقتوتى بورانوۆا.

ايتا كەتەيىك، 30-تامىزدان باستاپ جول ەرەجەسىن بۇزعان ساموكاتشىلارعا ايىپپۇل سالىنادى. قۇقىقبۇزۋشىلىقتار انىقتالسا، ولار ا ق ب ت ك 593-بابى (5 ا ە ك ايىپپۇل) نەمەسە ا ق ب ت ك 620-بابى (ەسكەرتۋ نەمەسە 3 ا ە ك ايىپپۇل) بويىنشا جاۋاپقا تارتىلادى.

شەت ەلدەردىڭ تاجىريبەسى كورسەتكەندەي، ەلەكتر سكۋتەرلەرىنىڭ قارقىندى دامۋى مەن بەي- بەرەكەت جۇمىس ىستەۋى ولارعا تولىق تىيىم سالۋعا اكەلۋى مۇمكىن. سوندىقتان، جول قوزعالىسىنىڭ قاۋىپسىزدىگىن قامتاماسىز ەتۋ ءۇشىن سكۋتەرلەردى پايدالانۋدى رەتتەۋ ماسەلەسى وتە ماڭىزدى جانە ونىڭ شەشىلۋىن جول قوزعالىسىنىڭ بارلىق قاتىسۋشىلارى كۇتەدى. ءبىز ءوز تاراپىمىزدان كەز كەلگەن ۇسىنىستاردى وڭىرلىك جانە ورتالىق دەڭگەيلەردە قاراستىرۋعا دايىنبىز، - دەدى اقتوتى بورانوۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى