كۇدىكتىنى ۇستاپ العان تۇرعىندار وزدەرى جازالاماق بولدى
الەۋمەتتىك جەلىدە بازار ىشىندەگى جانجالدىڭ ۆيدەوسى تارادى. وندا تۇرعىندار «اقشا ۇرلادى» دەپ كۇدىككە ىلىنگەن ەر ادامدى وزدەرى جازالاماقشى بولعان. قاۋىپتەن قاشقان كۇدىكتى جۇك كولىگىنىڭ استىنا تىعىلىپ بوي تاسالاماق بولسا دا، كوپشىلىك سۇيرەپ سىرتقا شىعارىپ العان. كەيىننەن وقيعا ورنىنا كەلگەن ءتارتىپ ساقشىلارىنا تاپسىردى.
بۇل جاعداي سايرام اۋدانىنداعى مال بازاردا بولعان. ۆيدەو اۆتورلارىنىڭ ايتۋىنشا كۇدىكتى بەس ادامنىڭ اقشاسىن ۇرلاپ كەتكەن.
ال، تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى مال بازارداعى جانجال بويىنشا تەرگەۋ جۇرگىزىلىپ جاتقانىن جەتكىزدى.
«اتالعان وقيعاعا قاتىسۋشىلاردىڭ جەكە باسى انىقتالىپ، ولاردان جاۋاپ الىنۋدا. سونىمەن قاتار ۇرلىق فاكتىسى بويىنشا پوليتسياعا ەشقانداي ارىز- شاعىم تۇسكەن جوق. قازىرگى ۋاقىتتا ەر ادامدى ۇرىپ- سوققان ادامدارعا قاتىستى قاجەتتى ءىس- شارالار كەشەنى جۇرگىزىلۋدە، ناتيجەسى بويىنشا زاڭدى پروتسەسسۋالدىق شەشىم قابىلداناتىن بولادى» - دەلىنگەن اقپاراتتا.
