شىمكەنتتە پوليتسيا قىزمەتى باسشىلارى سوتتالدى
سىبايلاس جەمقورلىققا قارسى ءىس- قيمىل اگەنتتىگى شىمكەنت قالاسىنىڭ قىلمىستىق ىستەر جونىندەگى اۋدانارالىق سوتى 4-روتا كومانديرى ق. ءالىمحانوۆ پەن 8-روتا كومانديرى ن. مىرزاليەۆكە قاتىستى ۇكىم شىعارىلعانىن مالىمدەدى. ءالىمحانوۆ پەن مىرزاليەۆ 7 جىلعا باس بوستاندىعىنان ايىرىلىپ، مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرىلدى. ۇكىم زاڭدى كۇشىنە ەنگەن جوق.
سوتتالعاندار شىمكەنت قالاسى سىبايلاس جەمقورلىققا قارسى قىزمەت دەپارتامەنتىمەن جانە پوليتسيا دەپارتامەنتىنىڭ وزدىك قاۋىپسىزدىك باسقارماسىمەن اشكەرەلەنگەن بولاتىن. ولار قىزمەتتەگى جالپى قامقورلىعى ءۇشىن تۇراقتى نەگىزدە باعىنىستىلاردان 5 تەن 10 مىڭ تەڭگەگە دەيىن بىرنەشە رەت پارا الدى دەپ ايىپتالدى.
بۇدان باسقا، ءالىمحانوۆ اكىمشىلىك جاۋاپكەرشىلىككە تارتپاعانى ءۇشىن ءوزىنىڭ قاراماعىنداعىلار ارقىلى شىمكەنت قالاسىنىڭ تۇرعىنىنان 130 مىڭ تەڭگە سوماسىندا زاڭسىز سىياقى العان. سىبايلاس جەمقورلىققا قارسى قىزمەت پەن ءى ءى م- ءنىڭ جەمقورلىق فاكتىلەرىن انىقتاۋ جانە جولىن كەسۋ جونىندەگى ءوزارا ىنتىماقتاستىق تۋرالى مەموراندۋم اياسىندا بىرلەسكەن جۇمىسى جالعاسىپ جاتىر.
