قىتايمەن اراداعى ۆيزاسىز رەجيم قاشان كۇشىنە ەنەدى
قازىرگى كەزدە قىتاي تاراپىنان مەملەكەتىشىلىك راسىمدەردىڭ اياقتالعانى تۋرالى حابارلاما تۇسكەن جوق. ءوز كەزەگىندە قازاقستان جاعى قازىرگى ۋاقىتتا ەلىمىزدەگى مۇددەلى مەملەكەتتىك ورگاندارمەن بىرلەسىپ مەملەكەتىشىلىك راسىمدەردى جۇرگىزىپ جاتىر. ءوزارا ۆيزاسىز رەجيمنىڭ كۇشىنە ەنۋى تۋرالى اقپارات قازاقستاندىق ب ا ق- تا رەسمي تۇردە جاريالانادى جانە ەلىمىزدىڭ سىرتقى ىستەر مينيسترلىگىنىڭ رەسمي ينتەرنەت- رەسۋرسىندا ورنالاستىرىلادى، - دەلىنگەن قازاقستان سىرتقى ىستەر مينيسترلىگىنىڭ «قازاقپارات» اگەنتتىگىنە بەرگەن جاۋابىندا.
اتاپ ايتقاندا، قازاقستان مەن قىتاي اراسىنداعى ءوزارا ۆيزاسىز رەجيم تۋرالى كەلىسىمنىڭ 11- بابىندا ۆيزانىڭ كۇشىنە ەنۋ تالاپتارى ەسكەرىلگەن.
وسى كەلىسىم بەلگىلەنبەگەن مەرزىمگە جاسالادى جانە ۋاعدالاسۋشى تاراپتاردىڭ ونىڭ كۇشىنە ەنۋى ءۇشىن قاجەت مەملەكەتىشىلىك راسىمدەردى ورىنداعانى تۋرالى سوڭعى حابارلامانى ديپلوماتيالىق ارنالار ارقىلى العان كۇننەن باستاپ كۇنتىزبەلىك 30 كۇن وتكەن سوڭ كۇشىنە ەنەدى، - دەپ اتالىپ وتكەن قۇجاتتا.
ەستەرىڭىزگە سالا كەتەيىك، قازاقستان رەسپۋبليكاسىنىڭ پرەزيدەنتى قاسىم- جومارت توقايەۆتىڭ بيىل قىتاي حالىق رەسپۋبليكاسىنا مەملەكەتتىك ساپارى اياسىندا ءبىرقاتار قۇجاتقا قول قويىلدى. ولاردىڭ اراسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم» بار.
بيىل مامىر ايىنىڭ اياعىندا ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ بۇل باعىتتا ەندى مەملەكەتىشىلىك راسىمدەردى اياقتاۋ ەسكەرىلگەنىن، سونداي- اق ءتيىستى قاۋلىنى قابىلداۋعا ءبىراز ۋاقىت كەرەك ەكەنىن ايتتى.
وسىعان دەيىن سىرتقى ىستەر مينيسترلىگى قىتايمەن اراداعى ۆيزاسىز رەجيمگە قاتىستى تۇسىنىك بەردى.
