قازاقستان مەن قىرعىزستان اراسىندا شەكارا جاقسى بەكىتىلگەن - دەپۋتات
دەپۋتاتتىڭ ايتۋىنشا، قازاقستان مەن قىرعىزستان اراسىندا شەكارا جاقسى بەكىتىلگەن.
«جامبىل وبلىسى مەن الماتى وبلىسى تۇيىسەتىن قازاق - قىرعىز شەكاراسىنىڭ ەڭ بيىك بەكەتىنە كەلدىك. ءبىزدىڭ قىرعىز مەملەكەتىمەن شەكارامىز جاقسى بەكىتىلگەنىنە كوزىم جەتتى. بيىك قورشاۋ، سىم تەمىر، كەيبىر جەردە ەلەكتر توقتارى بار، باقىلاۋ مۇنارالارى دا از ەمەس. ال قىرعىز مەملەكەتى تاراپىنان ءجاي ءبىر ادام بويىمەن بىردەي سىم قورشاۋ، بولدى. باسقا ەشتەڭە جوق.
باستى سەبەپ: «قىرعىز ۇكىمەتى شەكارا بيۋدجەتىن قىرعىز - تاجىك شەكاراسىنا جۇمسايدى» دەگەن جاۋاپ الدىق. ياعني «باۋىرلاس قازاق حالقىنا سەنەدى» دەگەن ءسوز»، - دەيدى سامات نۇرتازا.
ول سونداي- اق قازاق - قىرعىز شەكاراسىنداعى كەنەسارى حان مەن باتىرلارىنا ارنالعان ەسكەرتكىشتىڭ باسىندا بولىپ، قۇران باعىشتاعانىن جازدى.
ەسكە سالايىق، پارلامەنت ءماجىلىسىنىڭ دەپۋتاتتارى ولجاس قۇسپەكوۆ، ماكسيم روجين، بولات كەرىمبەك جانە سامات نۇرتازا الماتى تاۋلارىندا بولاشاق شەكاراشى كۋرسانتتارمەن اسكەري دايىندىقتان وتكەن ەدى. سامات نۇرتازا الداعى ۋاقىتتا ماكسيم روجين ەكەۋى جامبىل وبلىسىمەن شەكتەسەتىن قىرعىزستان شەكاراسىنا، ولجاس قۇسپەكوۆ پەن بولات كەرىمبەكوۆ جەتىسۋ وبلىسىمەن شەكتەسەتىن قىتاي شەكاراسىنا باراتىنىن ايتقان ەدى.
