فوتوگرافتىڭ مىندەتى سۋرەتتى سويلەتۋ - تالعات تانىبايەۆ
سولتۇستىك قازاقستاندىق فوتوگراف تالعات تانىبايەۆتىڭ العاشقى فوتوكورمەسىن «Qyzyljar» ارت- ورتالىعىنان تاماشالاۋعا بولادى. مۇندا ىزدەنىس پەن كوپ جىلعى ەڭبەكتىڭ جەمىسى - ەرەكشە سۋرەتتەر ورىن تەپكەن. كىمدى بولسىن بەيجاي قالدىرمايتىن بۇل تۋىندىلار قىزىلجار ءوڭىرىنىڭ اسەم تابيعاتى، ونىڭ ەڭبەكقور دا، دارىندى، اقجارقىن تۇرعىندارى جايىندا سىر شەرتىپ، جالپى، ءومىردىڭ قاس- قاعىم جارقىن ساتتەرىمەن بولىسەدى.
تالعات تانىبايەۆ وبلىستىق «سولتۇستىك قازاقستان» گازەتىنىڭ ءفوتوتىلشىسى. ونىڭ سۋرەتتەرى مەرزىمدى باسپا ءسوزدىڭ مازمۇنىن اشىپ، شىرايىن كەلتىرەدى. وڭىردەگى ايتۋلى وقيعا بولسىن، ەڭبەگىمەن ابىروي بيىگىنەن كورىنگەن تۇلعا بولسىن، تابيعاتتىڭ عاجايىبى بولا ما - مۇنىڭ ەشقايسىسى فوتوگرافتىڭ وبەكتيۆىنەن تىس قالعان ەمەس.
«گازەتتىڭ فوتوءتىلشىسى بولعاندىقتان ءىس- شارالارعا، ءتۇرلى جيىندارعا كوپ بارامىن. ۇنەمى وقيعا ورنىندا جۇرەمىن. جۇمىسىم وزىمە ۇنايدى. بۇل سالادا ەڭبەك ەتكەنىمە بيىل 18 جىل بولىپتى. نەگىزگى ماماندىعىم - ينجەنەر- مەحانيك. بالا كەزىمدە فوتوگراف بولامىن دەپ ويلاماپپىن. دەسەك تە، شىعارماشىلىققا جاقىن بولدىم. جاقسى سۋرەت سالامىن.
جەرگىلىكتى تەلەارنادا ناعاشىم ەڭبەك ەتتى، مەن ونىڭ جۇمىسىنا قىزىعىپ، ءجيى باراتىنمىن. مەنىڭ وسى سالاعا كەلۋىمە سول كىسى سەبەپكەر بولدى. قىزىعۋشىلىعىمدى بايقاپ، باعىت- باعدار بەردى، تەلەوپەراتورلارعا قوسىپ، ولاردان ۇيرەنۋىمە كومەكتەستى. قازىرگى جەتىستىگىم - ەڭبەكقورلىق پەن ىزدەنىمپازدىق ناتيجەسى»، - دەيدى تالعات تانىبايەۆ.
فوتوگرافتىڭ ايتۋىنشا، قازىر ونىڭ قورىندا جۇزدەگەن فوتوسۋرەت بار. ال العاشقى اۆتورلىق كورمەسىنە سونىڭ ەڭ ۇزدىك دەگەن 30-ى عانا قويىلدى.
«ۇيالى تەلەفوننىڭ پايدا بولۋىمەن قازىر اركىم فوتوعا تۇسىرە بەرەدى. ءبىراق، فوتو سويلەۋى كەرەك، ول كورگەن ادامعا ەموتسيا سىيلاۋى ءتيىس. سۋرەتكە قاراپ ادام ءتۇسىنۋى كەرەك نە بولىپ جانە قايدا بولىپ جاتقانىن. فوتوعا تۇسىرگەندە جارىق تا، راكۋرس تا، ءتۇسىرىپ جاتقان وبەكتىڭ دە ماڭىزدى. ماسەلەن، سپورتتىق ءىس- شارانى تۇسىرەتىن بولساڭ بەلگىلى ءبىر ءساتتى قالت جىبەرمەۋىڭ كەرەك. ال پەيزاجدى ءتۇسىرۋدىڭ ءوز قىر- سىرى بار.
الەۋمەتتىك جەلىگە سالىناتىن سۋرەت ءبىر باسقا دا، گازەت- جۋرنال بەتىندە شىعاتىن فوتونىڭ ءوز تالاپتارى بار. گازەتتە جاريالاناتىن رەپورتاجدى ءبىر عانا كادرمەن بەرۋگە بولادى. رەپورتاجدىق كادردى ۇيىمداستىرۋعا، نە بولماسا ويدان شىعارىپ تۇسىرۋگە بولمايدى. بۇل، ارينە، شەبەرلىكتى، تاجىريبەنى، ۇنەمى كاسىبي شىڭدالۋدى جانە وراسان ەڭبەكتى قاجەت ەتەدى. فوتوگرافتىڭ كوزقاراسى ەرەكشە بولۋى ماڭىزدى، باسقالار ءمان بەرمەگەندى، كوپشىلىك كورمەگەندى بايقاپ، وبەكتيۆىنە الۋى كەرەك»، - دەيدى تالعات تانىبايەۆ.
تالعاتتىڭ مۇراعاتىندا پەيزاج دا، پورترەت تە، رەپورتاج دا بار. دەسەك تە، اۋىلدا تۋىپ، بالالىق شاعى اۋىلدا وتكەندىكتەن بولار، وعان اۋىلدىڭ تۇرمىسىن، ۇلتتىق ناقىشىن جوعالتپاعان قازاقى ەلدىمەكەندەردى ءتۇسىرۋ جانىنا جاقىن.
«اۋداندارعا، اۋىلدارعا ءجيى ىسساپارمەن شىعىپ تۇرامىز. شالعايداعى ەلدىمەكەندەرگە بارعان ۇنايدى. مۇندايدا مەن بارىنشا تۇمسا تابيعاتتى، ادەمى جەرلەرىن، ەرەكشە ادامداردى تۇسىرۋگە تىرىسامىن. مەن بەلگىلى ءبىر ستيلدى ۇستانبايمىن، قالاي كورەمىن، سولاي تۇسىرەمىن. كەي فوتوتىلشىلەر كادردى الدىن الا جوسپارلايدى، ال مەن وسى ۋاقىتتا قاس- قاعىم ءساتتى تۇسىرگەندى ۇناتامىن.
جالپى، جاقسى فوتوگراف بولۋ ءۇشىن قىمبات فوتواپپاراتتىڭ بولۋى جەتكىلىكسىز. ادامنىڭ ءوز كوزقاراسى بولۋى ءتيىس. بۇگىندە فوتوگراف كوپ. ءبىراق، ءوز قولتاڭباسى بار كاسىبي ماماندار ساناۋلى»، - دەيدى فوتوگراف.
ماماننىڭ ايتۋىنشا، كەيدە ءساتتى كادر ءۇشىن ءبىراز ەڭبەكتەنۋگە، تاۋەكەلگە بارۋعا، ال كەيدە بىرنەشە كۇندەپ كۇتۋگە تۋرا كەلەدى.
«ىسساپارمەن ايىرتاۋ اۋدانىنداعى شاعىن عانا سارىساي اۋىلىنا جول ءتۇستى. ەلدىمەكەن توبەنىڭ ەتەگىندە تۇر ەكەن. اۋىلدى جوعارىدان تۇسىرمەك بولىپ، ءدوڭنىڭ ۇستىنە شىقپاق بولدىم. كۇن سالقىن، جەل وڭمەنىڭنەن وتەدى، ورتا جولعا جەتكەندە جاڭبىر جاۋىپ كەتتى. شىلقىپ سۋ بولدىم. ءبىراق ادەمى كادرعا قول جەتكىزۋ ءۇشىن قيىندىققا قاراماي دوڭگە شىقتىم. جوعارىدان الاقانداعىداي كورىنگەن اۋىلدى فوتوعا ءساتتى ءتۇسىرىپ، بار شارشاعانىم ۇمىت بولدى»، - دەيدى ءفوتوتىلشى.
تالعات تانىبايەۆتىڭ فوتورەپورتاجى 2016 -جىلى پرەزيدەنت اكىمشىلىگى جۋرناليستەر اراسىندا ۇيىمداستىرعان سايىستا ءۇشىنشى ورىندى يەلەنگەن ەكەن.
