قاڭعىباس ءيت قوقىستا جىلاپ جاتقان تاستاندى ءسابيدى قۇتقاردى
قاڭعىباس ءيت قوقىس دورباسىنا سالىنعان كىشكەنتاي ءسابيدى قۇتقاردى. ونى بەلگىسىز بىرەۋلەر مۋنيتسيپالدى عيماراتتىڭ جانىنا تاستاپ كەتكەن، دەپ حابارلايدى قازاقپارات The National باسىلىمىنا سىلتەمە جاساپ.
ءوتىپ بارا جاتقان ادام يەسىز ءيتتىڭ قوقىستان ءبىر دوربانى شىعارىپ، اۋزىندا تىستەپ تۇرعانىن كورىپ قالادى.
قارا قاپشىقتان بالانىڭ قىستىعىپ جىلاعان داۋسى ەستىلەدى.
ول قىزدى دەرەۋ تريپولي مەملەكەتتىك اۋرۋحاناسىنا جەتكىزدى.
جەلىدە تاراعان فوتوسۋرەتتەن نارەستەنىڭ بەتى مەن دەنەسىندە قىزارعان جانە كوگەرگەن جاراقات ءىزى بار ەكەنىن كورۋگە بولادى.
بالانىڭ جاسى تۋرالى قاراما-قايشى دەرەكتەر ايتىلدى.
كەيبىر اقپارات كوزى ونىڭ شامامەن 4 -ايلىق ەكەنىن حابارلاسا، باسقالارى قوقىسقا تاستاعاننان بىرنەشە ساعات بۇرىن عانا دۇنيەگە كەلگەن شاقالاق دەپ مالىمدەدى.
ينتەرنەتتە وسى حابار تاراعان كەزدە كوپتەگەن الەۋمەتتىك جەلى قولدانۋشىلارى قىزدى اسىراپ العىسى كەلەتىنىن جازدى.
«كەيبىرەۋلەر ءيتتى تازا ەمەس جانۋار دەيدى. ارينە، بۇل ولاي ەمەس، - دەپ جازدى ءبىر قولدانۋشى الەۋمەتتىك جەلىدە. - ءيتتىڭ ادام كەيپىندەگى كەيبىر مۋتانتتارعا قاراعاندا ادامگەرشىلىگى، مەيىرىمى، قۋلىعى مەن اقىل-ويى الدەقايدا كوپ».
«جانۋارلار ادامعا قاراعاندا الدەقايدا جاناشىر»، - دەپ جازدى تاعى بىرەۋى.
جەرگىلىكتى ب ا ق قىزدىڭ جاعدايىن اۋىر، ءبىراق تۇراقتى دەپ حابارلادى.
اۋرۋحانا قوسىمشا اقپارات بەرگەن جوق، ويتكەنى سارسەنبىدەن بەرى ەل يسلام جاڭا جىلىن تويلاپ جاتىر، ياعني مەملەكەتتىك مەكەمەلەر مەرەكەگە بايلانىستى جابىق.
پوليتسيا بۇل وقيعانى زەرتتەپ، بالانى تاستاپ كەتكەندەردى ىزدەپ جاتىر.
