كۇشتى جەل قاراعاندى وبلىسىندا بىرنەشە عيماراتتىڭ شاتىرىن ۇشىرىپ اكەتتى

21- شىلدەدە قاتتى جەلدىڭ سالدارىنان ب. س. بەيسەنوۆ اتىنداعى قاراعاندىدا ق ر ءى ءى م قاراعاندى اكادەمياسىنىڭ كازارماسى عيماراتىنىڭ شاتىرى ۇشىپ كەتتى.

زاقىم كەلگەن اۋماق - 700 شارشى مەتر.

ايتا كەتۋ كەرەك، ءبىر اي بۇرىن ءدال وسى وقۋ ورنىندا وسىنداي توتەنشە جاعداي بولعان ەدى.

سونىمەن قاتار، داۋىلدى جەل تەمىرتاۋ قالاسىنداعى عيماراتتاردىڭ دا شاتىرىن جۇلىپ الدى.

«قاتتى جەلدىڭ سالدارىنان پانفيلوۆ كوشەسىندەگى 50 شارشى مەتر الاڭداعى ەكى قاباتتى تۇرعىن ءۇيدىڭ، تيشەنكو كوشەسىندەگى 150 شارشى مەتر الاڭداعى بەس قاباتتى كوپفۋنكتسيونالدى عيماراتتىڭ شاتىرى بۇزىلدى، شاتىر قۇرىلىمى قۇلادى. سالدارىنان قاراعاندى يندۋستريالىق ۋنيۆەرسيتەتىنىڭ كورشىلەس جاتاقحانا عيماراتىنىڭ 10 تەرەزە بلوكتارى زاقىمداندى. رەسپۋبليكا داڭعىلىنداعى ەكى قاباتتى مەشىت عيماراتىنىڭ 250 شارشى مەتر توبەسى زاقىمداندى»، - دەپ حابارلادى قاراعاندى وبلىسى ت ج د باسپا ءسوز قىزمەتى.

كەشەگى جەل بۇقار جىراۋ اۋدانىنا دا زارداپ اكەلدى. اقتوبە اۋىلىندا 300 شارشى مەتر اۋماقتا ەكى قاباتتى جالپى ءبىلىم بەرەتىن مەكتەپ عيماراتىنىڭ شاتىرى بۇزىلدى.

ال بوتاقارا كەنتىندە ەكى قاباتتى تۇرعىن ءۇي مەن جالپى ءبىلىم بەرەتىن مەكتەپتىڭ سپورتزال عيماراتى زارداپ شەكتى.

جوعارىدا اتالعان بارلىق جاعدايلاردا زارداپ شەككەندەر جوق. ءبىراق جول اپاتىنىڭ سالدارىنان كەشە 65 جاستاعى ەر ادام زاقىم الدى.

ول «قاراعاندى-استانا» تاسجولىمەن جۇرەتىن رەيستىك اۆتوبۋستىڭ سالونىندا بولعان. جولاۋشىلار كولىگى قاتتى جەلدىڭ اسەرىنەن اۋدارىلىپ قالعان.

21- شىلدەدە قاراعاندى وبلىسىندا نايزاعاي مەن جەلدىڭ كۇشەيۋىنە بايلانىستى داۋىلدى ەسكەرتۋ جاريالاندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى