جەتىسۋ وبلىسىنداعى سەمەنت زاۋىتىنىڭ جۇرگىزۋشىلەرى ەكىنشى كۇن قاتارىنان جۇمىسىن توقتاتتى
ولاردىڭ مۇنداي ارەكەتكە بارۋىنا جول كولىك اپاتىنىڭ جيىلەۋى سەبەپ بولعان. ايتۋلارىنشا، كولىكتەر تەحنيكالىق تەكسەرۋدەن وتپەي توقتاۋسىز جۇمىس ىستەيدى. رۇقسات ەتىلگەن 18 توننانىڭ ورنىنا 35-40 توننا شيكىزات تيەلەدى. كۇنى كەشە تاعى ءبىر كولىك اپاتقا ۇشىراپ، جۇرگىزۋشىنىڭ اياعى سىنىپ، جامباسى شىققان. اۋىر جۇك تيەگەن كولىكتىڭ تەجەگىشى ىستەن شىعىپ، قاتتى ەكپىنمەن تاۋعا سوعىلعان. جۇمىسشىلاردىڭ پايىمداۋىنشا، زاۋىتتاعى كولىكتەرگە تەحنيكالىق تەكسەرۋ مۇلدەم جۇرگىزىلمەيدى. جالاقى تومەن.
«مىناعان قانداي كومەكتەر كورسەتىلەدى، قانداي جاردەم بولادى دەپ سۇراساق، باسشىلارىمىز ەشقانداي اقشا تولەنبەيتىندىگىن ايتتى. ءبىز جانىمىز اشىپ، باۋىرىمىز سونداي حالدە جاتقانىن كورىپ، جۇمىستى توقتاتۋعا ءماجبۇر بولدىق»، - دەدى كولىك جۇرگىزۋشى ەرجان داۋلەتباقوۆ.
ورتاق مامىلەگە كەلە الماعان ەكى تاراپتىڭ ماسەلەسىنە جەرگىلىكتى بيلىك وكىلدەرى مەن پروكۋراتۋرا ارالاستى. ناتيجەسىندە جۇمىس بەرۋشىلەر جۇرگىزۋشىلەرمەن قايتادان كەلىسىمشارتقا وتىراتىن بولدى. سونداي-اق سەمەنت زاۋىتىنىڭ باسشىلارى بۇدان بىلاي كولىككە شامادان تىس جۇك تيەۋدى توقتاتىپ، قازاقستان زاڭنامالارىندا بەلگىلەنگەن مولشەرمەن شيكىزات تاسىمالدايتىن بولدى.
«ءبىز بۇدان بىلاي تەحنيكانى قاتاڭ باقىلاۋعا الامىز. جوندەۋ تسەحى مەن كولىكتى جوندەيتىن جۇمىسشىلاردىڭ دا جۇمىسىن قاداعالايمىز. جۇرگىزۋشىلەردىڭ ۇسىنىستارىن نازارعا الامىز. ءوزىمىز دە جاڭا تالاپتار قوياتىن بولامىز. زارداپ شەككەن ازاماتقا كومەك كورسەتىپ، جاعدايىن جەكە ءوزىم باقىلاپ وتىرامىن»، - دەدى كولىكتىك كومپانيا قۇرىلتايشىسى دجۋ سياۋ لۋ.
