جانىپ جاتقان كولىكتەن ادامداردى الىپ شىققان ازاماتتار مەملەكەتتىك ماراپاتقا ۇسىنىلدى
وقيعا وبلىستىق ماڭىزى بار ەكپىندى-سوزاق تاسجولى بويىندا بولعان. Nissan، Toyota Camry جانە Volkswagen Grafter اۆتوكولىكتەرى سوقتىعىسىپ، تولىعىمەن ورتەنىپ كەتتى. سول وقيعا ورتاسىندا بولعان مۇرات ەسەنقابىلوۆ پەن باقىتجان مارات ۇلى جانىپ جاتقان كولىك ىشىنەن 10 نان استام جولاۋشىنى قاۋىپسىز ايماققا شىعارىپ، قۇتقارعان بولاتىن.
بۇگىن سوزاق اۋدانىنىڭ اكىمى مۇحيت تۇرىسبەكوۆ بەيبىت كۇننىڭ باتىرلارىن ارنايى قابىلداپ، العىس حاتپەن ماراپاتتادى.
«سىن ساعاتتا جانۇشىرا وتقا ءتۇسىپ، وزگەنىڭ جانىن اراشالاپ، كوزسىز ەرلىك كورسەتتىڭىزدەر. وسىناۋ باتىلدىقتارىڭىز ارقاسىندا وزگەلەرگە ءۇمىت سىيلاپ، حالىق تاراپىنان زور العىسقا يە بولدىڭىزدار. الداعى ۋاقىتتا دا ەلدىك ماسەلەدە ايانىپ قالماي، كوپتىڭ كوڭىلىنەن شىعاتىندارىڭىزعا سەنەمىن»، - دەگەن اۋدان باسشىسى قوس ازاماتتىڭ مەملەكەتتىك ماراپاتقا ۇسىنىلعانىن اتاپ ءوتتى.
كەزدەسۋدە ءىرى جول-كولىك اپاتىن باستان وتكەرگەن ازاماتتار وقيعانىڭ ءمان-جايىن ايتىپ بەردى.
«بۇل وتە اۋىر جاعداي بولدى. كولىكتەن ءتۇسىپ، ەڭ الدىمەن قاسىمداعى جۇرگىزۋشى جىگىتكە كومەك بەردىم. ودان سوڭ قارسى باعىتتا جانىپ جاتقان كولىك ىشىندەگى جولاۋشىلاردى بىرتىندەپ قاۋىپسىز جەرگە شىعارا باستادىم. مەنىڭ باستى ماقساتىم - اپاتتان زارداپ شەككەن ازاماتتارعا كومەكتەسۋ بولدى. بۇلاي ۇلكەن قۇرمەتكە بولەنەمىن دەپ ويلامادىم»، - دەدى مۇرات ەسەنقابىلوۆ.
ال، 20 جاستاعى باقىتجان مارات ۇلى جانىپ جاتقان كولىك ىشىنەن سىرتقا تەرەزە ارقىلى شىققان. ەسەڭگىرەپ قالعان جىگىت الدىمەن بالالاردى كورگەن. سودان كولىكتە قىسىلىپ قالعان 2 ءبۇلدىرشىن قىز بەن 1 اۋىلداس دوسىن سىرتقا الىپ شىققان. كەيىن قىزىل جالىننىڭ اراسىنا كىرىپ، 3 ادامدى قاۋىپسىز جەرگە جەتكىزگەن.
ەسكە سالساق، 17- شىلدە كۇنى تۇركىستان وبلىسىندا جول اپاتىنان 9 ادام قازا تاۋىپ، 13 ادام اۋرۋحاناعا جەتكىزىلدى. وسى وقيعا بولعان كەزدە رەسپۋبليكادا ءۇش كۇندە جول اپاتىنان 24 ادام كوز جۇمعان.
