قازاقستان، قىرعىزستان، تۇرىكمەنستان مەن وزبەكستان فۋتبولدان تۋرنير وتكىزىپ تۇرۋعا كەلىستى
بۇل تۋرالى قىرعىز فۋتبول وداعىنىڭ باسپا ءسوز قىزمەتى مالىمدەدى، دەپ حابارلايدى قازاقپارات «كابار» اگەنتتىگىنە سىلتەمە جاساپ.
وعان قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ، ق ف و پرەزيدەنتى مەدەربەك سىدىقوۆ، تۇرىكمەنستان فۋتبول فەدەراتسياسىنىڭ پرەزيدەنتى ارسلان اينازاروۆ پەن وزبەكستان فۋتبول قاۋىمداستىعىنىڭ ۆيتسە-پرەزيدەنتى راۆشان يرماتوۆ قاتىستى.
تاراپتار ىنتىماقتاستىقتى نىعايتۋ جوسپارىن، ورتاق جوبالاردىڭ نەگىزگى ماسەلەلەرى، ينفراقۇرىلىم، كادر الەۋەتىن ارتتىرۋ مەن قارجىلاندىرۋدى قامتاماسىز ەتۋ ماسەلەلەرىن تالقىلادى. حالىقارالىق دارەجەدەگى تۋرنيرلەردى بىرگە ۇيىمداستىرۋ، ونىڭ ىشىندە ءتۇرلى جاس ساناتىنداعى كوماندالاردىڭ الەم بىرىنشىلىكتەرىن ۇيىمداستىرۋ مۇمكىندىگىن قاراستىردى.
«تاراپتار ءبىر-بىرىنە جان-جاقتى قولداۋ كورسەتۋگە دايىن، ونىڭ ىشىندە اقپارات جانە تاجىريبە الماسۋ دا بار. كەزدەسۋ بارىسىندا قاۋىمداستىق جەتەكشىلەرىنىڭ ءبارى سەرىكتەستىكتى جاڭا دارەجەگە جەتكىزۋگە نيەتتى ەكەندەرىن ءبىلدىردى»، - دەپ مالىمدەدى ق ف و- دان.
كەزدەسۋ قورىتىندىسى بويىنشا، ورتالىق ازياداعى تۇركىتىلدەس ەلدەردىڭ فۋتبولىن دامىتاتىن جۇمىس توبىن قۇرۋ تۋرالى حاتتاماعا قول قويۋ شەشىمى قابىلداندى.
