ءسىزدى ءيت قاۋىپ السا: قايدا جانە قالاي ارىزدانۋ كەرەك؟

كەيدە سول ءيت نەمەسە كۇشىك قاۋىپ، ادامعا شابۋىل جاساۋى مۇمكىن. سەبەبى تۇمسىق تورمەن دە تورسىز دا جۇرەتىن يتتەر بار. تۇمسىق تورسىز جۇرگەن ءيت قاۋىپ السا نە ىستەۋ كەرەك؟ يتتەردىڭ تۇمسىق تورسىز ءجۇرۋى زاڭدى ما؟

Massaget.kz ءتىلشىسى زاڭگەرلەردەن سۇراپ انىقتاپ كوردى.

زاڭگەر عابيت ومىربەك ءيتىڭىز بولسا كوشەدە تۇمسىققا ارنالعان تورسىز جۇرۋگە بولمايتىنىن ايتادى.

«بۇل - زاڭعا قايشى ارەكەت. ەگەر تۇمسىققا ارنالعان تورسىز ءجۇرىپ، ءيت بىرەۋدى قاۋىپ السا، جابىرلەنۋشى ادامعا مورالدىق شىعىندى تولىق وتەۋگە تۋرا كەلەدى. سەبەبى ول يتكە قۇتىرماعا قارسى ۋكول سالىنعان نە سالىنباعانىن بىلمەيمىز. ەگەر ءيتتىڭ قۇتىرما اۋرۋى بولسا، ادام 15 كۇننىڭ ىشىندە ءولىپ كەتۋى مۇمكىن. سوندىقتان يتپەن كوشەگە شىققاندا جانۋاردا تۇمسىعىنا ارنالعان تور بولۋى كەرەك. تۇمسىقتورسىز شىققان كۇننىڭ وزىندە ءيتتى شىنجىرمەن بايلاپ شىعۋ قاجەت. ونىڭ ۇزىندىعى 1 مەتردەن اسپاۋى كەرەك»، - دەپ ءتۇسىندىردى زاڭگەر.

ال ءيت ادامدى قاۋىپ العان جاعدايدا جابىرلەنۋشى وقيعا بولعان جەردى سۋرەتكە ءتۇسىرىپ الۋى قاجەت. سونىمەن قاتار، بىردەن جەدەل جاردەم شاقىرۋ كەرەك. ارتىنشا ءيتتىڭ يەسىنىڭ ۇستىنەن ارىز جازىپ، شاعىمدانۋعا قۇقىعى بار.

«ارىزدى وقيعا قاي جەردە بولدى سول ايماقتىڭ پوليتسيا باسقارماسىنا بارىپ جازادى. ءيتتىڭ يەسىنە اكىمشىلىك حاتتاما تولتىرىلادى. ال ەگەر كەلتىرىلگەن زارداپ اۋىر بولسا، اۋرۋحانادان قۇجاتتاردى الىپ، ەمىنە شامامەن قانشا كەتەتىنىن انىقتاپ، اقشانى ءوندىرىپ الا الادى»، - دەيدى عابيت ومىربەك.

ال اقشانى جابىرلەنۋشى سوت ارقىلى ءوندىرىپ الادى.

«ءيت قاپقان ادام مىندەتتى تۇردە ەسەپكە الىنادى. اپتا سايىن اۋرۋحاناعا قارالىپ تۇرادى. سول ۋاقىت ارالىعىندا جۇمىسقا شىعا الماۋى مۇمكىن. ءبارىن ەسەپتەي كەلە اقشانى ازاماتتىق سوت ارقىلى ءوندىرىپ الۋعا بولادى. ءبىراق ءيتتىڭ قاپقانى جايلى ناقتى دالەلدەر كەرەك. ياعني ءيتتىڭ يەسىنە قاتىستى اكىمشىلىك حاتتامالار تولتىرىلىپ، زاڭ بويىنشا ءتيىستى شارالار قولدانۋ كەرەك. سول شەشىم ارقىلى عانا سوتقا ارىزدانۋعا بولادى»، - دەپ ءتۇسىندىردى مامان.

ەسكە سالايىق، وزبەكستانداعى باياۋت اۋدانىندا ءيتى ءوز يەسىن تىستەپ العان بولاتىن. سالدارىنان ەر ادام قايتىس بولدى.

18- شىلدەدە ساعات 19:20 دا سىرداريا وبلىستىق جۇقپالى اۋرۋلار اۋرۋحاناسىنا قۇتىرما اۋرۋىن جۇقتىرعان 64 جاستاعى ەر ادام تۇسكەن. اقپاندا ءوزىنىڭ ءيتى سول جاق بالتىرى تۇسىنان تىستەپ العان. وكىنىشكە قاراي، اسا ءمان بەرمەي، شىلدەدە عانا ەمدەۋ مەكەمەسىنە جۇگىنگەن. كەشىگىپ كەلگەنى سالدارىنان، ەر ادام 19- شىلدەدە ساعات 21:35 تە سىرداريا اۋداندىق جۇقپالى اۋرۋلار اۋرۋحاناسىندا قايتىس بولعانى ايتىلدى.

ءمايىت ساراپتاماعا جىبەرىلىپ، ماماندار قايتىس بولعان ەر ادامنىڭ تۇرعىلىقتى جەرىنە بارىپ، ءيتتىڭ تاعى دا باسقا بىرەۋدى تىستەپ العانىن انىقتاعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى