وتكەن عاسىردا ەڭ قاۋىپتى سانالعان حاكەر قايتىس بولدى
باسىلىم اقپاراتى بويىنشا، كيەۆين ميتنيك ۇيقى بەزى قاتەرلى ىسىگىنىڭ اسقىنۋىنان كوز جۇمعان. وعان بۇل دياگنوز ءبىر جىلدان استام ۋاقىت بۇرىن قويىلعان ەدى، پيتتسبۋرگ ۋنيۆەرسيتەتىنىڭ مەديتسينالىق ورتالىعىندا ەم العان.
1990-جىلدارى كيەۆين ەڭ قاۋىپتى امەريكالىق حاكەرلەردىڭ ءبىرى بولدى. ول بۇكىل ەل بويىنشا كومپيۋتەر قولدانۋشىلارىنىڭ نەسيە كارتاسى بويىنشا دەرەكتەر جيناقتالعان فايلداردى قولدى قىلعان. ءارتۇرلى كومپيۋتەر جۇيەسى مەن تەلەفون جەلىلەرىنە حاكەرلىك شابۋىل جاساعان. سول كەزدە ا ق ش قاۋىپسىزدىك قىزمەتى ونى «الەمدەگى ەڭ قاۋىپتى حاكەر دەپ تانىپ» ىزدەۋمەن بەلسەندى اينالىستى. 1995-جىلى (ىزدەۋ جاريالانعاننان كەيىن 2 جىل وتكەن سوڭ بارىپ) عانا قولعا ءتۇسىردى. ونى كومپيۋتەرلىك الاياقتىق پەن تەلەفون مالىمەتتەرىن قولدى ەتتى دەپ ايىپتادى. ونىڭ شابۋىلىنان Digital Equipment Corporation ،Apple ،Nokia ،Motorola جانە باسقا دا كومپانيالار زارداپ شەككەن دەگەن دەرەكتەر دە بار.
1998-جىلى كيەۆيننىڭ جاقتاستارى The New York Times گازەتىنىڭ ۆەب-سايتىنا حاكەرلىك شابۋىل جاساپ، جۇمىستارىن توقتاتۋعا تىرىستى. كەيىننەن حاكەر كەي الاياقتىعىن مويىنداپ جازا الدى، دەگەنمەن ونىڭ ادۆوكاتتارى كوپ ءىسىن اقتاپ شىقتى. ناتيجەسىندە ءىستىڭ ۇزاققا سوزىلۋى مەن كەي ايىپتار بويىنشا اقتالۋىنا بايلانىستى تۇرمەدە 11 ايداي ۋاقىت قانا وتىردى.
2000-جىلى بوستاندىققا شىققاننان كەيىن كىتاپ جازىپ، جازۋشىلىققا بەت بۇرعان. پۋبليتسيست رەتىندە دە تانىلدى. 2003-جىلى عانا وعان كومپيۋتەرلىك تەحنيكالاردى قولدانۋعا رۇقسات بەرىلدى. 2010-جىلى كومپيۋتەر قاۋىپسىزدىگى بويىنشا كەڭەسشى بولعان. كومپيۋتەرلىك جانە جەلىلىك قاۋىپسىزدىك قىزمەتىمەن اينالىساتىن Defensive Thinking Inc كومپانياسىن قۇرعان.
