مۇمكىندىگى شەكتەۋلى جاندار ۇشاق بيلەتى باعاسىنىڭ جارتىسىن عانا تولەپ ساياحاتتاي الادى
ءماجىلىس دەپۋتاتى، AMANAT پارتياسى فراكتسياسىنىڭ مۇشەسى ەرلان ابديەۆ ەرەكشە قاجەتتىلىگى بار ادامداردىڭ ماسەلەسىن ءجيى قوزعاپ، ولارعا اۋە بيلەتىنە جەڭىلدىك قاراستىرۋ كەرەك ەكەنىن دەپۋتاتتىق ساۋالدارىندا كوتەرگەن ەدى.
«مەنىڭ العاشقى دەپۋتاتتىق ساۋالىمنىڭ ءبىرى مۇگەدەكتىگى بار جاندارعا اۋە بيلەتىنە جەڭىلدىكتىڭ جوقتىعى جايلى بولدى. وسى ماسەلە بويىنشا پارلامەنت قابىرعاسىندا تاقىرىپتىق وتىرىس ۇيىمداستىردىم. وعان مەملەكەتتىك ورگاندار مەن اۋەكومپانيالاردىڭ وكىلدەرى قاتىستى. اۋەتاسىمالداۋشىلاردىڭ ءبىرى مۇمكىندىگى شەكتەۋلى جاندارعا جەڭىلدىكتەر جاريالادى»، - دەپ جازدى ەرلان ابديەۆ ءوزىنىڭ الەۋمەتتىك جەلىدەگى پاراقشاسىندا.
ايتا كەتەيىك، ەلىمىز بويىنشا «AMANAT» پارتياسىنىڭ «كەدەرگىسىز كەلەشەك» جوباسى اياسىندا قوعامدىق نىساندارعا مونيتورينگ جۇرگىزىلىپ جاتىر.
جوبانىڭ ماقساتى - ەرەكشە قاجەتتىلىگى بار ادامداردىڭ ءومىر ساپاسىن جاقسارتۋ جانە ولار ءۇشىن كەدەرگىسىز ورتا قۇرۋ.
