زەينەتكەرلەر مۇلىك سالىعىن تولەي مە
الەۋمەتتىك جەلىلەر مەن مەسسەندجەرلەردە تاراعان بۇل اقپارات شىندىققا جاناسپايدى، دەپ حابارلايدى قازاقپارات مەملەكەتتىك كىرىستەر كوميتەتىنىڭ باسپا ءسوز قىزمەتىنە سىلتەمە جاساپ.
سالىق كودەكسىنە سايكەس بولەك تۇراتىن زەينەتكەرلەر زاڭدى مەكەنجايى (ولاردىڭ تۇرعىلىقتى مەكەنجايى) بويىنشا تەك قانا زەينەتكەرلەر تىركەلگەن بارلىق سالىق سالۋ وبەكتىسىنىڭ جالپى قۇنىنان ايلىق ەسەپتىك كورسەتكىشتىڭ 1000 ەسەلەنگەن مولشەرى شەگىندە بوساتىلادى. ەسەپتەۋ بارىسىندا رەسپۋبليكالىق بيۋدجەت تۋرالى زاڭدا بەلگىلەنگەن جانە ءتيىستى قارجى جىلىنىڭ 1 قاڭتارىنا قولدانىستا بولاتىن ايلىق ەسەپتىك كورسەتكىش مولشەرى قولدانىلادى.
سونىمەن قاتار، كەلەسى تۇلعالار دا جەكە تۇلعالاردىڭ مۇلىك سالىعىنان:
1) ايلىق ەسەپتىك كورسەتكىشتىڭ 1000 ەسەلەنگەن مولشەرى شەگىندە - كەڭەس وداعىنىڭ باتىرلارى، سوتسياليستىك ەڭبەك ەرلەرى, «حالىق قاھارمانى»، «قازاقستاننىڭ ەڭبەك ەرى» اتاقتارىنا يە بولعان، ءۇش دارەجەلى داڭق وردەنىمەن جانە «وتان» وردەنىمەن ناگرادتالعان ادامدار، «باتىر انا» اتاعىمەن جانە «التىن القا» القاسىمەن ناگرادتالعان كوپ بالالى انالار؛
2) ايلىق ەسەپتىك كورسەتكىشتىڭ 1500 ەسەلەنگەن مولشەرى شەگىندە - ەكىنشى دۇنيەجۇزىلىك سوعىس ارداگەرلەرى، جەڭىلدىكتەر بويىنشا ەكىنشى دۇنيەجۇزىلىك سوعىس ارداگەرلەرىنە تەڭەستىرىلگەن ارداگەرلەر جانە باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرى، ەكىنشى دۇنيەجۇزىلىك سوعىس جىلدارىندا تىلداعى قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى ك س ر وداعىنىڭ وردەندەرىمەن جانە مەدالدارىمەن ناگرادتالعان ادامدار، سونداي-اق 1941 -جىلعى 22-ماۋسىم - 1945 -جىلعى 9-مامىر ارالىعىندا كەمىندە التى اي جۇمىس ىستەگەن (قىزمەت وتكەرگەن) جانە ەكىنشى دۇنيەجۇزىلىك سوعىس جىلدارىندا تىلداعى قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى ك س ر وداعىنىڭ وردەندەرىمەن جانە مەدالدارىمەن ناگرادتالماعان ادامدار، مۇگەدەكتىگى بار ادامدار، سونداي-اق سالىق كودەكسىنىڭ 526-بابىنىڭ 2-تارماعىندا بەلگىلەنگەن وزگە دە تۇلعالار بوساتىلادى.
ايتا كەتسەك، 2022 -جىل ءۇشىن مۇلىك سالىعىن تولەۋ مەرزىمى 2023 -جىلدىڭ 1-قازانىندا اياقتالادى.
