الماتىلىق دارىگەرلەر ءبىر كەلىگە تولمايتىن سالماقپەن ومىرگە كەلگەن ءسابيدى امان الىپ قالدى
الماتى قالالىق قوعامدىق دەنساۋلىق ساقتاۋ باسقارماسى نارەستە جۇكتىلىكتىڭ 29-اپتاسىندا وتە اۋىر جاعدايدا دۇنيەگە كەلگەنىن حابارلادى.
اناسىنا الماتى قالاسىنىڭ №2-قالالىق پەريناتالدىق ورتالىعىندا كەسار تىلىگى جاسالدى.
سالماعى 980 گرام نارەستە دۇنيەگە كەلىپ، بىردەن جان ساقتاۋ بولىمىنە اۋىستىرىلدى.
«بالا 23 كۇن بويى وزدىگىنەن دەم الا المادى، سەبەبى ، وكپەسى جەتىلمەگەن، سونىمەن قاتار، وعان پنيەۆمونيا، جەدەل رەسپيراتورلىق ديسترەسس- سيندرومى، وكپە اتەلەكتازى، 2-دارەجەلى قارىنشاىشىلىك قان كەتۋ (مي قارىنشالارىنا قان كەتۋ)، نەكروتيكالىق ەنتەروكوليت (ىشەك شىرىشتى قابىعىنىڭ نەكروزى)، سەرەبرالدى دەپرەسسيا سيندرومى (تومەندەۋ)، قوزعالىس بەلسەندىلىگى، ديففۋزدى بۇلشىقەت گيپوتەنزياسى، شارتسىز رەفلەكستەردىڭ تەجەلۋى، وتە قىسقا ويانۋ كەزەڭدەرى، مي يشەمياسى، دۆس- سيندرومى دياگنوزى قويىلعان»، - دەپ حابارلادى ۆەدومستۆو.
ءبولىم مەڭگەرۋشىسىنىڭ مىندەتىن اتقارۋشى جۇلدىز احمەتقاليەۆا جاڭا تۋعان نارەستەدە قان ۇيۋ جۇيەسىندە ترومبوزدىڭ بۇزىلۋىمەن سيپاتتالاتىن جانە ترومبوزبەن دە، قان كەتۋمەن دە جۇرەتىن كۇردەلى پاتولوگيالىق پروتسەسس بولعانىن ايتتى.
«23 كۇن بويى نارەستە مەحانيكالىق جەلدەتۋدە جاتتى. جاعدايدى تۇراقتاندىرعان سوڭ ءبىز ونى اپپاراتتان الىپ، تاعى ءۇش كۇن جان ساقتاۋ بولىمىندە باقىلادىق. سودان كەيىن ول رەانيماتسيا بولمەسىنە اۋىستىرىلدى. وندا 7 كۇن بولدى جانە اناسىمەن بىرگە بولۋ ءۇشىن پالاتاعا اۋىستىرىلدى. قازىر بالانىڭ سالماعى 2300 گرام»، - دەدى جۇلدىز احمەتقاليەۆا.
سونداي-اق، رەانيماتسيادا دارىگەرلەر كورۋ، ەستۋ قابىلەتىن ساقتاۋ ءۇشىن كۇرەسىپ، بىرتىندەپ وزدىگىمەن تاماقتانۋعا جانە اسقازان- ىشەك جولدارىنىڭ قالىپتى جۇمىسىنا كەلتىردى.
ءوز كەزەگىندە بالانىڭ اناسى اق حالاتتى ابزال جاندارعا جانقيارلىق ەڭبەگى ءۇشىن العىس ايتتى.
«بارلىعى ءۇشىن، باعا جەتپەس قولداۋى ءۇشىن دارىگەرلەرگە كوپ راحمەت. سول كەزدە مەن نە ىستەرىمدى، بالاما قالاي كومەكتەسەتىنىمدى بىلمەدىم. دارىگەرلەر مەن مەدبيكەلەردىڭ ارقاسىندا عانا مەنىڭ بالام قازىر قاسىمدا. مىنە، ءبىز ۇيگە شىعۋعا دايىندالىپ جاتىرمىز»، - دەدى نارەستەنىڭ اناسى.
