ەلىمىزدەگى ءاربىر ءۇشىنشى توننا ەت اقمولا وبلىسىندا وندىرىلەدى
اقمولا وبلىستىق كاسىپكەرلىك جانە تۋريزم باسقارماسىنىڭ مالىمەتىنشە، قازىرگى كۇنى وبلىستا جالپى ىشكى ءونىمنىڭ 27,6 پايىزى ونەركاسىپ سالاسىنىڭ ۇلەسىنە تيەدى. ال، ونەركاسىپ سالاسىنىڭ ءوز ىشىندە وڭدەۋشى كاسىپورىندار ونىمدەرىنىڭ ۇلەسى - 78,6 پايىز.
ونەركاسىپ سالاسىندا بۇگىنگى كۇنى 732 كاسىپورىن جۇمىس ىستەيدى. ونىڭ ىشىندە ازىق-تۇلىك ونىمدەرىن وڭدەيتىن 145 كاسىپورىننىڭ ءبىرىنشى توقسانداعى وندىرگەن ءونىم كولەمى - جالپى ءونىمنىڭ 15,4 پايىزىن الدى.
سوڭعى بەس جىلدىڭ ىشىندە بۇل سالادا جوعارى ءوسىم ساقتالىپ كەلەدى. ناقتىراق الساق، 2018-جىلى - 107,6 پايىز، 2019- 103,2، 2020- 109,9، 2021- 115,5، 2022- 101,1 پايىز بولدى. بيىلعى العاشقى ءۇش ايداعى ازىق-تۇلىك ونىمدەرىن وڭدەۋ سالاسىنداعى ءوسىم - 4,1 پايىز. وسى كەزەڭ ىشىندە ەت جانە شۇجىق ونىمدەرىن شىعارۋ 10,8 پايىزعا، سارى ماي ءوندىرۋ 69,4 پايىزعا، وسىمدىك مايىن شىعارۋ 74,7 پايىزعا وسكەن.
«رەسپۋبليكامىزداعى ءبىزدىڭ وبلىسىمىزدىڭ وسى سالاداعى الاتىن ۇلەس سالماعى قوماقتى. ءاربىر ءۇشىنشى توننا ەت اقمولا وبلىسىندا وندىرىلەدى. سونداي-اق، ەلىمىز بويىنشا وندىرىلگەن ءاربىر 7-ليتر ءسۇت، ءاربىر 12 ليتر مينەرالدى سۋسىن، ءاربىر 12 توننا سارى ماي، ءاربىر 15 توننا ۇن ءبىزدىڭ وبلىسىمىزدىڭ ۇلەسىنە تيەدى»، - دەيدى باسقارما باسشىسىنىڭ ورىنباسارى الەكساندر زاگرەبين.
قازىرگى كۇنى وبلىستا وندىرىلگەن اۋىل شارۋاشىلىعى ءونىمى ءوڭىر تۇرعىندارىن تولىق قامتاماسىز ەتىپ قانا قويماي، رەسپۋبليكانىڭ باسقا ايماقتارىنا جانە شەت ەلدەرگە ەكسپورتقا شىعارۋعا مۇمكىندىك بەرەدى. ماسەلەن، ۇن شىعارۋ وبلىس تۇرعىندارىنىڭ قاجەتتىلىگىنەن 33 ەسەگە، قۇس ەتىن ءوندىرۋ 7 ەسەگە، جۇمىرتقا ءوندىرۋ 3,5 ەسەگە ارتىق.
«ءوز قاجەتىمىزدەن ارتىقتاردى ساتۋعا شىعارامىز. مۇنىڭ ءوزى ايماعىمىزدىڭ ونىمدەرىن ەكسپورتقا شىعارۋ كولەمىن ارتتىرۋعا يگى ىقپالىن تيگىزىپ وتىر. وبلىسىمىزدا وڭدەۋشى سالا كاسىپورىندارىن سالۋ جوبالارى ودان ءارى جالعاسىپ جاتىر. قازىرگى كۇنى 478 ميلليارد تەڭگەنىڭ 65 جوباسى جۇزەگە اسىرىلۋ ۇستىندە. بۇل جوبالار ىسكە قوسىلعاندا 5,5 مىڭ قوسىمشا جۇمىس ورىندارى اشىلماق. ولاردىڭ 3/1 ءى ازىق-تۇلىك ونىمدەرىن وڭدەيتىن كاسىپورىنداردىڭ ۇلەسىنە تيەدى. تاراتا ايتار بولساق: «يۋنيكورنحولدينگس» قۇس فابريكاسىن سالۋ جوباسىنا 65 ميلليارد تەڭگە قاراستىرىلىپ وتىر. قۇس فابريكاسى جىلىنا 50 مىڭ توننا قۇس ەتىن شىعاراتىن بولادى. جۇمىس ىستەپ تۇرعان «ماكينسك قۇس فابريكاسى» ءونىمىن جىلىنا 100 مىڭ تونناعا جەتكىزۋ جوباسىنا 25,7 ميلليارد تەڭگە قاراستىرىلىپ وتىر. جوبا ىسكە قوسىلعاندا قوسىمشا 33 مىڭ توننا ەت ونىمدەرى شىعارىلاتىن بولادى. جىلىنا 5000 كەلى وسەتر يكراسىن شىعاراتىن «اكۆا ۆيكتوريا» سەرىكتەستىگىنىڭ جابىق سۋ توعانىن سالۋعا 4,3 ميلليارد تەڭگە ءبولىندى»، - دەپ تولىقتىردى الەكساندر زاگرەبين.
باسقارما باسشىسىنىڭ ورىنباسارى اتاپ وتكەندەي، وڭىردە اۋىلشارۋاشىلىعى ونىمدەرىن ءوندىرۋ كولەمىن ارتتىرۋعا باعىتتىلعان ينۆەستيتسيالىق جوبالار دا قولعا الىنادى.
«وبلىستا 50 ءىرى ينۆەستيتسيالىق جوبالاردى بىرىكتىرەتىن جول كارتاسى بەكىتىلدى. بۇل جوبالاردى جۇزەگە اسىرۋعا 250 ميلليارد تەڭگەدەن استام قارجى ءبولىنىپ وتىر. ينۆەستيتسيالىق جوبالار 2021-2025 -جىلدارعا ارنالعان. وسى جوبالاردى جۇزەگە اسىرۋ ازىق-تۇلىك ونىمدەرىن ءوندىرۋ كولەمىن ايتارلىقتاي ارتتىرۋعا مۇمكىندىك جاسايدى. سونداي-اق، وڭىردە استىق پەن كوكونىس ساقتاۋ قويمالارىنىڭ سىيىمدىلىعىن 176 مىڭ تونناعا جەتكىزۋ جوسپارلانىپ وتىر. جوعارىدا اتالعان جوبالاردى جۇزەگە اسىرۋ قوسىمشا 2,5 مىڭ جۇمىس ورنىن اشۋعا مۇمكىندىك جاسايدى»، - دەپ تۇيىندەدى الەكساندر زاگرەبين.
ايتا كەتسەك، بۇدان بۇرىن قازاقستاندا العاش رەت ءىرى قارا مال تۇقىمدارى كورمەگە شىعارىلعانىن جازعان ەدىك.
