ءبيشى، ۇرمەلى اسپاپ مامانى مەن سيرك ارتىستەرىنە ارنايى تولەم قوسۋ ۇسىنىلدى
بۇل تۋرالى ۆەدومستۆو جاريالاعان رەتتەۋشىلىك ساياساتتىڭ كونسۋلتاتيۆتىك قۇجاتىندا جازىلعان، دەپ حابارلايدى قازاقپارات ءتىلشىسى.
«كاسىبي ەڭبەك ءوتىلى كەمىندە 20 جىل بولعان جانە زەينەتكەرلىك جاسقا تولعانعا دەيىن بالەت ءارتىسى لاۋازىمىندا ەڭبەك ەتكەن ونەر ادامى اي سايىن ارنايى اقشالاي تولەم الۋعا قۇقىلى. ونىڭ مولشەرى سوڭعى 3 جىلداعى ورتاشا ايلىق جالاقىسىنىڭ كەمىندە %60 ىن قۇرايدى. دەگەنمەن، رەسپۋبليكالىق بيۋجەتتە قارجى جىلىنا بەلگىلەنگەن ايلىق ەسەپتىك كورسەتكىشتىڭ 109 ەسەلەنگەن مولشەرىنەن اسپايدى»، - دەپ جازىلعان قۇجاتتا.
وسىعان بايلانىستى مەملەكەتتىك ۇيىمداردا قىزمەت ەتەتىن ۇرمەلى مۋزىكالىق اسپاپتاردا وينايتىن ماماندار، سيرك ارتىستەرى مەن ءبي انسامبلدەرىنىڭ مۇشەلەرى جيى شاعىم ايتادى. سەبەبى، ولار وسىنداي كومەك الاتىن قىزمەتكەرلەر ساناتىنا جاتپايدى. سوندىقتان، مينيسترلىك زاڭناماعا تۇزەتۋ ەنگىزۋ ارقىلى اي سايىن ارنايى اقشالاي تولەم الاتىن ماماندار قاتارىنا وسى ارتىستەردى كىرگىزۋدى ۇسىنادى.
«بەلگىلى ءبىر جاسقا جەتكەندە ارتىستەردىڭ بۇل ساناتىنداعى كوپتەگەن ادامدار فيزيولوگيالىق جانە ەستەتيكالىق سيپاتتاعى ەرەكشەلىكتەرىنە بايلانىستى زەينەتكەرلىك جاستى كۇتپەستەن كاسىپتەن كەتەدى. ويتكەنى، 20-25 جىلدىق قىزمەتتەن كەيىن ولار كاسىبي اۋرۋلارعا شالدىعادى. مىسالى، ۇرمەلى اسپاپ ارتىستەرى جاق-بەت بۇلشىقەت اۋرۋلارىنا شالدىعادى. ءبي انسامبلدەرى ارتىستەرىنىڭ كاسىبي قىزمەتى كۇردەلىلىگى جاعىنان بالەت ارتىستەرىنىڭ جۇمىسىنان ەش ايىرماشىلىعى جوق. سيرك ارتىستەرى ءتۇرلى اكروباتيكالىق جاتتىعۋلاردى ورىندايدى. بۇل ولاردىڭ ءومىرى مەن دەنساۋلىعىنا قاۋىپ توندىرەدى»، - دەلىنگەن مينيسترلىك ۇسىنىسىندا.
