پەتروپاۆلدا كوپقاباتتى ءۇيدىڭ قابىرعاسىندا جامبىل بەينەلەنگەن پاننو پايدا بولدى

جامبىل جابايەۆتىڭ سۋرەتى سالىنعان پاننو جىر الىبىنىڭ ەسىمىن يەلەنگەن كوشەدە الىستان مەنمۇندالايدى.

ول «جاس وركەن» ىقشاماۋدانىندا ورنالاسقان كوپقاباتتى ۇيلەردىڭ ءبىرىنىڭ قابىرعاسىنا قالانعان.

بۇل پاننو دا بۇعان دەيىن پەتروپاۆلدا پايدا بولعان ابايدىڭ پورترەتى سياقتى ەرەكشە ادىسپەن - كەراميكالىق موزايكادان قۇراستىرىلىپ جاسالعان.

پورترەتتىڭ اۆتورى - پەتروپاۆل قالاسىنىڭ تۋماسى، قازاقستان سۋرەتشىلەر وداعىنىڭ مۇشەسى بولات اسەربەكوۆ.

«ءار پليتكانىڭ ءوز ءنومىرى بار. ول تومەننەن كورىنبەيدى. ونى ءتىپتى اۋدارىپ قويۋعا دا بولمايدى، ويتكەنى، كۇنگە باسقاشا شاعىلىساتىن بولادى. پليتكالاردى ءبىر اي بويى قابىرعاعا اسىلىپ، پازل سياقتى جينادىق. بۇل ماتەريالدىڭ بىرەگەيلىگى - توزبايدى. ول جاڭبىر مەن سۋىققا ءتوزىمدى. ارحەولوگيالىق جۇمىس جۇرگىزگەندە ىدىس- اياقتىڭ كەراميكالىق بولشەكتەرى تابىلىپ جاتادى عوي، بۇل دا سول سياقتى، 830 گرادۋس ىستىقتا قاتايتىلعان. پليتكالاردى 7-8 اي بويى ازىرلەدىك. ويتكەنى، ونىڭ نيۋانسى كوپ. كەيىن كۇيدىرۋ كەرەك، مەندەگى پەش تاۋلىگىنە 5 شارشى مەتردى عانا دايىنداي الادى»، - دەيدى بولات اسەربەكوۆ.

پاننو 200 شارشى مەتردەي اۋماققا ورنالاستىرىلعان.

كەراميكالىق موزايكانى جەرگىلىكتى ماماندار الماتىلىق بريگاديردىڭ جەتەكشىلىگىمەن قۇراستىرىپ شىقتى.

«جالپى وسىنداي پاننو قۇراستىرۋ يدەياسى ماعجانمەن بايلانىستى تۋدى. مەن وسى وڭىردە تۋعاندىقتان بۇل اقىنعا دەگەن قۇرمەتىم زور. مەنىڭ پىكىرىمشە، ەڭ الدىمەن شاھاردا ماعجاننىڭ بەينەسى پايدا بولۋى ءتيىس ەدى. سوندىقتان مەندە جوسپار بار، دايىن جوبا بار. اكىمدىك قولداسا جاساپ شىعۋعا ءازىرمىن»، - دەيدى سۋرەتشى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى