بالاباقشادا بۇلدىرشىندەر ەدەندە جاتۋعا ءماجبۇر بولعان
بۇعان بايلانىستى وبلىستىق ءبىلىم باسقارماسى تەكسەرۋ جۇمىستارىن باستاپ كەتتى، دەپ حابارلايدى قازاقپارات ءتىلشىسى.
الەۋمەتتىك جەلىدە قىزىلوردا وبلىسى قازالى اۋدانىنداعى بالاباقشادا بۇلدىرشىندەردىڭ ورىن تاپشىلىعىنان ەدەندە جاتۋعا ءماجبۇر بولعانى جونىندە ايتىلىپ، سۋرەتتەرى جاريالانعان. سونداي-اق، سۋرەتتە سابيلەردىڭ ءبىر ادامدىق ورىندا ەكى-ۇشەۋدەن جاتقانىن كورۋگە بولادى
بۇعان بايلانىستى وبلىستىق ءبىلىم باسقارماسى تۇسىنىكتەمە بەردى.
«قىزىلوردا وبلىسىنىڭ ءبىلىم باسقارماسى اتالمىش ماسەلەگە قاتىستى تومەندەگىنى مالىمدەيدى. وبلىستىق ءبىلىم باسقارماسى بۇگىندە ارنايى جۇمىسشى توبىن قۇرىپ، اۋدانداعى بالاباقشاعا زەردەلەۋ جۇمىستارىن جۇرگىزۋدە.
اتالعان زەردەلەۋ جۇمىستارىنىڭ قورىتىندىسى بويىنشا كەمشىلىكتەر انىقتالعان جاعدايدا ءتيىستى قۇزىرلى ورگاندارعا ۇسىنىلىپ، زاڭ اياسىندا شەشىمدەر قابىلدانادى»، - دەپ جازىلعان باسقارما حابارلاماسىندا.
ەسكە سالساق، قىزىلوردادا ءجىتى ىشەك اۋرۋلارىنا ۇشىراعانداردىڭ %87 ىن بالالار قۇرايدى.
